15 студзеня, Мінск /Уладзімір Мацвееў - БЕЛТА/. Памочнікам Прэзідэнта Рэспублікі Беларусь - інспектарам па Гродзенскай вобласці назначаны Іван Лаўрыновіч. Адпаведнае кадравае рашэнне прыняў кіраўнік дзяржавы Аляксандр Лукашэнка, перадае карэспандэнт БЕЛТА.
Звяртаючыся да Івана Лаўрыновіча, які да гэтага часу кіраваў Лёзненскім райвыканкамам, Прэзідэнт адзначыў, што добра ведае гэты раён і шмат чуў аб праведзенай там рабоце. "Вы чалавек вопытны. Гэта было маё рашэнне накіраваць вас у Гродзенскую вобласць. Вы разумееце, што гэта няпростая вобласць, высокаразвітая у сельскагаспадарчых адносінах. Наколькі я разумею, вы павінны быць добра знаёмы з Краўцовым (старшыня Гродзенскага аблвыканкама Уладзімір Краўцоў. - Заўвага БЕЛТА), і я спадзяюся, вы агульную мову знойдзеце там, дзе трэба. Але ў вас павінен быць свой, зыходзячы з вашага вопыту, погляд на кадры ў Гродзенскай вобласці", - сказаў Аляксандр Лукашэнка.
Іван Антонавіч Лаўрыновіч нарадзіўся ў 1968 годзе ў вёсцы Панфілаўшчына Глыбоцкага раёна. У 1996 годзе скончыў Велікалуцкую дзяржаўную сельскагаспадарчую акадэмію, у 2004-м - Акадэмію кіравання пры Прэзідэнце Беларусі.
У 1990-1991 гадах працаваў аграномам-глебазнаўцам Віцебскай абласной праектна-вышукальнай станцыі хімізацыі сельскай гаспадаркі.
З 1991 па 1999 год - начальнік участка, галоўны аграном, намеснік старшыні па інфармаванні і выхаваўчай рабоце ў калгасе імя Леніна Шаркаўшчынскага раёна. У 1999-2003 гадах кіраваў калгасам імя Фрунзэ Шаркаўшчынскага раёна, у 2003-2005 гадах быў старшынёй СВК "Каўшэлева" Шаркаўшчынскага раёна.
У 2005-2009 гадах - намеснік старшыні, начальнік упраўлення сельскай гаспадаркі і харчавання Шаркаўшчынскага райвыканкама. У канцы 2009 года займаў пасаду намесніка старшыні па галіновым будаўніцтве камітэта па сельскай гаспадарцы і харчаванні Віцебскага аблвыканкама. Затым быў назначаны старшынёй Лёзненскага райвыканкама і займаў гэту пасаду да цяперашняга часу.-0-
