Усёдазволенасці, хамству і адкрытаму бескультур'ю не месца ў нацыянальным інтэрнэт-сегменце. Такое меркаванне выказаў карэспандэнту БЕЛТА намеснік начальніка Магілёўскага гарвыканкама Андрэй Кунцэвіч, каменціруючы папраўкі ў закон "Аб сродках масавай інфармацыі".
Інтэрнэт па-свойму ўздзейнічае на пэўныя слаі насельніцтва, часам перасягаючы традыцыйныя сродкі масавай інфармацыі: газеты, радыё, тэлебачанне, канстатаваў Андрэй Кунцэвіч. Для многіх катэгорый грамадзян інтэрнэт становіцца асноўнай крыніцай інфармацыі, а значыць, меры, што прымаюцца дзяржавай па прававым рэгуляванні працэсаў, якія там адбываюцца, абсалютна апраўданы. Уладальнікі інтэрнэт-рэсурсаў, аўтары артыкулаў, блогаў, каментарыяў павінны несці адказнасць за іх змест у адпаведнасці з законам аб СМІ.
Безумоўна, любы мае права выказаць свае думкі, пункт гледжання, але нельга забываць аб старой добрай ісціне: асабістая свабода заканчваецца там, дзе пачынаецца асабістая свабода іншага чалавека, падкрэсліў Андрэй Кунцэвіч.
"У мінулым я практыкуючы журналіст. Працуючы над газетнымі матэрыяламі, я заўсёды помніў аб той адказнасці, чалавечай і прафесійнай, якая кладзецца на кожнага, хто бярэ на сябе права падзяліцца думкамі з іншымі, - адзначыў намеснік старшыні гарвыканкама. - Шчыра кажучы, чытаючы ў інтэрнэце асобныя артыкулы і каментарыі, проста дзівішся той гразі і пошласці, якая часам захліствае некаторых аўтараў. Дзяржава проста абавязана астуджваць такіх псеўдапісьменнікаў. Унесеныя ў закон аб СМІ папраўкі дадуць магчымасць навесці парадак у гэтай тэме, тым больш такі вопыт ужо ёсць у шэрагу іншых краін".
