22 кастрычніка, Мінск /Кар. БЕЛТА/. Галоўная задача вакцыны ад COVID-19 - перамагчы найбольш цяжкія выпадкі захворвання. Аб гэтым заявіў урач-інфекцыяніст, доктар медыцынскіх навук, рэктар Гомельскага дзяржаўнага медыцынскага ўніверсітэта Ігар Стома ў праграме "Маркаў. Нічога асабістага" на тэлеканале АНТ, паведамляе БЕЛТА.
Ігар Стома растлумачыў, што вакцына ўплывае не на колькасць інфіцыраваных, а на цяжкасць цячэння захворвання. Менавіта таму сярод цяжкіх пацыентаў у бальніцах, асабліва тых, хто знаходзіцца пад кіслародам або на ШВЛ, знаходзяцца пераважна непрышчэпленыя грамадзяне.
"Са з'яўленнем COVID-19 крыху змянілася парадыгма сучаснай вакцыналогіі ў свеце. Калі раней адносна класічных вакцын (напрыклад, супраць адру) мы ацэньвалі эфектыўнасць, разлічваючы колькасць хворых у групе прышчэпленых і ў групе непрышчэпленых, то адносна кавіду вельмі важна цяжкасць захворвання", - адзначыў Ігар Стома.
Ён параўнаў COVID-19 з гульнёй у косці: калі выпадае адна кропка - гэта бессімптомнае захворванне, дзве - насмарк, тры - пнеўманія, чатыры - кіслародазалежная пнеўманія, пяць - ШВЛ і шэсць - смяротны зыход. "Калі вы прышчапляецеся ад COVID-19, вы зафарбоўваеце на вашых ігральных кубіках лічбы пяць і шэсць. Астатнія застаюцца. Так, чалавек, прышчэплены ад COVID-19, можа захварэць на гэту інфекцыю, але ён рэзка зніжае шанцы цяжкіх выпадкаў захворвання", - падкрэсліў доктар медыцынскіх навук.
Медык разабраў прыклад ірландскага горада Уотэрфорд, дзе вакцынавана амаль усё насельніцтва. Аднак колькасць хворых тут б'е рэкорды краіны. "Цалкам зразумелая сітуацыя, калі разбіраць яе крыху глыбей, чым галаслоўныя заявы таблоідаў з Вялікабрытаніі і Ірландыі. У чым сутнасць: сама вакцына не змяняе рэзка эпідсітуацыю ў плане захваральнасці, яна вельмі значна дзейнічае на цяжкасць цячэння. Што здарылася ў тым жа Уотэрфорде: усё змяняецца, і змяняюцца штамы, людзі расслабіліся, перасталі выконваць меры абароны - захваральнасць пайшла ўверх. Але пры гэтым узровень смяротнасці рэзка не вырас", - заўважыў інфекцыяніст.
Прыкладна такая ж сітуацыя і ў Партугаліі - краіне, якая па памерах і колькасці насельніцтва можа параўнацца з Беларуссю. Толькі там больш за 80 працэнтаў прышчэпленых грамадзян. "Асенні ўздым захваральнасці і ў Партугаліі адзначаецца, і ён даволі істотны. Але пры гэтым разам з уздымам захваральнасці смяротнасць не расце. Гэта значыць мэта была дасягнута. Эфект вакцыны змог перамагчы найбольш цяжкія выпадкі COVID-19", - канстатаваў Ігар Стома.-0-
