Сцяг Аўторак, 19 сакавіка 2024
Усе навіны
Усе навіны
Эканоміка
07 мая 2021, 10:24

У Мінэканомікі расказалі аб палітыцы Беларусі ў сферы зялёных тэхналогій

7 мая, Мінск /Кар. БЕЛТА/. Аб дзяржаўнай палітыцы Беларусі ў сферы развіцця зялёнай эканомікі карэспандэнту БЕЛТА расказала намеснік міністра эканомікі Таццяна Бранцэвіч.

"Цяпер устойлівы эканамічны рост не можа быць забяспечаны без развіцця зялёнай эканомікі, і з улікам нацыянальных асаблівасцей і глабальных выклікаў наша краіна разглядае яе ў якасці важнага інструмента забеспячэння ўстойлівага развіцця і экалагічнай бяспекі, прымаючы паслядоўныя меры па ўкараненні зялёных (экалагічных) прынцыпаў у нацыянальную эканоміку", - сказала Таццяна Бранцэвіч.

Паводле яе слоў, на сённяшні момант прынята некалькі базавых дакументаў, якія фіксуюць дзяржаўную палітыку ў сферы развіцця зялёнай эканомікі, у тым ліку выкарыстання зялёных тэхналогій. Так, прынцыпы зялёнай эканомікі інтэграваны ў Нацыянальную стратэгію ўстойлівага сацыяльна-эканамічнага развіцця на перыяд да 2030 года. НСУР-2030 адлюстроўвае тры кампаненты ўстойлівага развіцця, акцэнтуючы ўвагу на трыядзе "чалавек - эканоміка - навакольнае асяроддзе".

"Дасягненне стратэгічнай мэты па забеспячэнні высокіх жыццёвых стандартаў насельніцтва і ўмоў для гарманічнага развіцця асобы на аснове пераходу да высокаэфектыўнай эканомікі, заснаванай на ведах і інавацыях, пры захаванні спрыяльнага навакольнага асяроддзя для будучых пакаленняў прадугледжвалася на першым этапе (2016-2020 гады). Гэта рэалізоўвалася за кошт пераходу да якаснага, збалансаванага росту эканомікі на аснове яе структурна-інстытуцыянальнай трансфармацыі з улікам прынцыпаў зялёнай эканомікі, прыярытэтнага развіцця высокатэхналагічных вытворчасцей, якія стануць асновай для павышэння канкурэнтаздольнасці краіны і якасці жыцця насельніцтва", - расказала намеснік міністра.

На другім этапе (2021-2030 гады) плануецца пераход да ўстойлівага развіцця, росту духоўна-маральных каштоўнасцей і дасягнення высокай якасці чалавечага развіцця на аснове далейшага станаўлення зялёнай эканомікі і паскоранага развіцця высокатэхналагічных вытворчасцей і паслуг.

Сістэмныя пытанні доўгатэрміновага развіцця зялёнай эканомікі і дасягнення мэт устойлівага развіцця таксама адлюстраваны ў дзеючай Нацыянальнай стратэгіі ўстойлівага сацыяльна-эканамічнага развіцця Беларусі да 2035 года, якая з'яўляецца актуалізаванай версіяй НСУР-2030.

"Новым вектарам развіцця (НСУР-2035) стане пераход да эканомікі замкнёнага цыкла (цыркулярнай эканомікі), якая дае магчымасць забяспечыць эканамічны рост за кошт больш эфектыўнага выкарыстання існуючых рэсурсаў, перапрацоўкі адходаў і вытворчасці тавараў з другасных рэсурсаў", - падкрэсліла Таццяна Бранцэвіч.

Таксама будуць укараняцца прынцыпы эканомікі замкнёнага цыкла, накіраваныя галоўным чынам не на кіраванне адходамі, а на прадухіленне іх утварэння праз укараненне экалагічнага дызайну, павышэнне рэсурсаэфектыўнасці вытворчасці, фарміраванне культуры адказнага спажывання тавараў і іншыя інструменты.

"Акцэнт на ўкараненні інструментаў падтрымкі зялёнай эканомікі закладзены ў праекце праграмы сацыяльна-эканамічнага развіцця Беларусі на 2021-2025 гады і Праграме дзейнасці ўрада на перыяд да 2025 года, зацверджанай пастановай Саўміна ад 24 снежня 2020 года нумар 758. Важна адзначыць, што адной з пастаўленых у гэтай праграме мэт у сферы экалагічнай палітыкі вызначана развіццё прыярытэтных напрамкаў зялёнай эканомікі (электратранспарт (інфраструктура), разумныя энергаэфектыўныя зялёныя гарады, эканоміка замкнёнага цыкла і інш.) і ўкараненне інструментаў яе падтрымкі", - адзначыла намеснік міністра.

Цяпер Міністэрствам прыродных рэсурсаў і аховы навакольнага асяроддзя сумесна з зацікаўленымі органамі дзяржаўнага кіравання актыўна вядзецца работа па распрацоўцы нацыянальнага плана дзеянняў па развіцці зялёнай эканомікі ў Беларусі да 2025 года.-0-

Падпісвайцеся на нас у
Twitter
Топ-навіны
Свежыя навіны Беларусі