25 сакавіка, Гомель /Кар. БЕЛТА/. Тураўскі малочны камбінат плануе больш як на 50 працэнтаў павялічыць аб'ёмы вытворчасці брэндавай прадукцыі ў 2019 годзе, паведаміла карэспандэнту БЕЛТА намеснік дырэктара па развіцці і меркетынгу прадпрыемства Наталля Чэрнік.
Па выніках 2018 года аб'ёмы вытворчасці прадукцыі павялічыліся на 48 працэнтаў (выпушчана 15,6 тыс. т сыроў) у параўнанні з паказчыкамі 2017-га.
На думку Наталлі Чэрнік, пастаўленую на 2019 год задачу дасягнуць прыросту больш як на 50 працэнтаў магчыма выканаць. Падставай для гэтага служыць увод у эксплуатацыю другой вытворчай лініі, што дасць магчымасць павялічыць магутнасці прадпрыемства ўтрая. "Запуск дадатковых вытворчых магутнасцей у 2018 годзе быў прадыктаваны змяненнямі рыначнай кан'юнктуры, ростам продажаў у новых сегментах і на новых рынках. Каля 80 працэнтаў нашых паўцвёрдых і мяккіх сыроў, якія выпускаюцца па італьянскіх тэхналогіях з беларускага малака, пастаўляюцца на экспарт у 14 краін", - расказала намеснік дырэктара. Штодзённа на камбінаце перапрацоўваюць каля 400 т малака, штомесячна з канвеераў выходзіць больш за 1,6 тыс. т сыроў. Акрамя таго, штогод абнаўляецца каля 35 працэнтаў таварнага асартыменту.
Поўнасцю аўтаматызаваныя нямецкія і італьянскія лініі далі магчымасць значна пашырыць асартыментны пералік. Новыя віды прадукцыі ТМК ужо занялі сваё месца ў адпаведным сегменце. Так, яе спажыўцамі сталі найбуйнейшыя ігракі рынку - прадстаўнікі сеткавых устаноў міжнародных франчайзераў, якія працуюць у сегментах піца-бізнесу, японскай кухні, кандытарскай і пякарскай справы.
"Патрабаванні кліентаў да прадуктаў вельмі высокія, а канкурэнцыя - жорсткая. Мы ганарымся тым, што ў нас атрымалася практычна экстэрнам здаць гэты экзамен і за паўгода пасля запуску дамагчыся якасці, супастаўляльнай з вядомымі міжнароднымі брэндамі. Гэта і адчыняе нам дзверы на найбольш ёмістых экспартных рынках - у Расіі, Кітаі і іншых краінах", - падкрэсліла Наталля Чэрнік.
Так высокую ацэнку атрымала прадукцыя ТМК на міжнароднай выстаўцы прадуктаў харчавання, напіткаў і сыравіны для іх вытворчасці ProdExpo 2019 у Маскве. Па выніках конкурснай праграмы і выстаўкі прадукцыя камбіната ўдастоена ганаровых узнагарод. Напрыклад, лепшым інавацыйным прадуктам па выніках міжнароднага конкурсу "Лепшы прадукт - 2019" быў названы сыр мяккі Ricotta двухслаёвы з напаўняльнікам "Ківі" Bonfesto. Залатога медаля былі ўдастоены мяккія сыры Cream cheese з напаўняльнікам "Неапалітанскі" Bonfesto і Mozzarella mini Bonfesto. У конкурсе-дэгустацыі "Лепшы смак" камбінату быў уручаны дыплом пераможцы 1-й ступені за сыр мяккі тварожны Cremolle Bonfesto.
ААТ "Тураўскі малочны камбінат" - сучаснае высокатэхналагічнае прадпрыемства па вытворчасці паўцвёрдых і мяккіх сыроў па італьянскіх тэхналогіях. Запуск у эксплуатацыю і першыя адгрузкі гатовай прадукцыі адбыліся ў 2013 годзе. Будаўніцтва камбіната было часткай Дзяржаўнай праграмы развіцця Прыпяцкага Палесся. Сёння прадпрыемства актыўна працуе над развіццём уласнай сыравіннай зоны. Цяпер магутнасці Тураўскага малочнага камбіната разлічаны на перапрацоўку 750 т малака ў суткі.-0-
