30 лістапада, Мінск /Кар. БЕЛТА/. Нацыянальны банк Беларусі ў 2023 годзе будзе забяспечваць прывабнасць зберажэнняў у нацыянальнай валюце. Аб гэтым гаворыцца ў зацверджаных указам Прэзідэнта Асноўных напрамках грашова-крэдытнай палітыкі на 2023 год, паведамляе БЕЛТА.
"Захаваецца накіраванасць працэнтнай палітыкі Нацыянальнага банка на падтрыманне працэнтных ставак у эканоміцы на станоўчым узроўні ў рэальным выражэнні, што з'яўляецца неабходнай умовай для забеспячэння прывабнасці зберажэнняў у нацыянальнай валюце і фарміравання крыніц для крэдытавання эканомікі. Стаўка рэфінансавання Нацыянальнага банка ацэньваецца на ўзроўні 10-11 працэнтаў гадавых у сярэднім за 2023 год", - гаворыцца ў дакуменце.
Правядзенне курсавой палітыкі па-ранейшаму будзе ажыццяўляцца ў рэжыме плаваючага курса, які дае магчымасць змякчаць уплыў знешніх фактараў на эканоміку і садзейнічае яе эфектыўнай адаптацыі да зменлівых умоў. "Валютны курс прадоўжыць вызначацца попытам і прапанаваннем на валютным рынку. Пры гэтым дапускаецца правядзенне валютных інтэрвенцый для згладжвання рэзкіх ваганняў курса беларускага рубля, а таксама ў мэтах папаўнення золатавалютных рэзерваў", - адзначаецца ў АНГКП.
Цяпер назіраецца ўстойлівае паступленне сродкаў насельніцтва ў банкаўскія ўклады (дэпазіты) у нацыянальнай валюце. З мая 2022 года аднавіўся прыток банкаўскіх укладаў (дэпазітаў) фізічных асоб у замежнай валюце пасля іх адтоку ў лютым-красавіку 2022 года. Паляпшэнню сітуацыі на дэпазітным рынку садзейнічала падтрыманне банкамі прывабнага ўзроўню даходнасці па ўкладах.
"У мэтах умацавання рэсурснага патэнцыялу банкаўскай сістэмы, што дазваляе сфарміраваць устойлівую базу для крэдытнай падтрымкі эканомікі, дзеянні Нацыянальнага банка ў першую чаргу будуць накіраваны на фарміраванне ўмоў для развіцця доўгатэрміновага сегмента дэпазітнага рынку, які садзейнічае збалансаванасці структуры актываў і пасіваў банкаў, а таксама для павелічэння долі рублёвага складніка ў структуры банкаўскіх укладаў (дэпазітаў). Банкі па-ранейшаму будуць арыентаваны на распрацоўку і ўкараненне новых банкаўскіх прадуктаў, што адпавядаюць сучасным патрабаванням, паляпшэнне якасці банкаўскіх паслуг, развіццё комплекснага банкаўскага абслугоўвання фізічных і юрыдычных асоб", - прадугледжана ў дакуменце.-0-
