25 студзеня, Мінск /Кар. БЕЛТА/. Міністэрства архітэктуры і будаўніцтва абнавіла парадак рэгулявання цэн на будматэрыялы. Гэта прадугледжана ведамаснай пастановай 30 снежня 2022 года нумар 116, якая афіцыйна апублікавана на Нацыянальным прававым інтэрнэт-партале, паведамляе БЕЛТА.
Згодна з дакументам, для вытворцаў нарматыў рэнтабельнасці, якую можна ўключаць у адпускныя цэны на тавары, вызначаны ў памеры 20 працэнтаў (без уліку выдаткаў, якія звязаны з транспарціроўкай да месца прымянення). Размова ідзе аб продажы тавараў для будаўніцтва аб'ектаў або вытворчасці тавараў. Калі тавар прызначаны для рэалізацыі на гандлёвых аб'ектах - 15 працэнтаў да планавага сабекошту вытворчасці і рэалізацыі (без уліку расходаў на транспарціроўку).
Для імпарцёраў гранічная максімальная надбаўка да кантрактнай цаны і расходаў па імпарце таксама ўстаноўлена ў памеры 15 працэнтаў, а для суб'ектаў, якія ажыццяўляюць аптовы гандаль, - 10 працэнтаў (незалежна ад колькасці пасрэднікаў, якія ўдзельнічаюць).
Акрамя таго, не дапускаецца павялічваць цэны на тавары больш як на 30 працэнтаў у гадавым выражэнні ў параўнанні з цэнамі, устаноўленымі на 31 снежня 2022 года. У выпадку адсутнасці тавараў на гэту дату арыенцірам будзе дата першага ўстанаўлення цаны ў бягучым годзе (без уліку скідак, прома-акцый).
Дакумент уступіць у сілу з 26 студзеня і будзе дзейнічаць да 1 студзеня 2024 года.-0-
