25 студзеня, Масква /Эдуард Півавар - БЕЛТА/. Прадстаўнікі краін Еўразійскага эканамічнага саюза ўзгаднілі пазіцыі па шэрагу прынцыповых пытанняў, звязаных з фарміраваннем агульнага электраэнергетычнага рынку. Аб гэтым БЕЛТА паведамілі ў прэс-службе Еўразійскай эканамічнай камісіі па выніках пасяджэння Кансультатыўнага камітэта па электраэнергетыцы, якое прайшло пад старшынствам члена Калегіі (міністра) па энергетыцы і інфраструктуры ЕЭК Эміля Кайкіева.
"Прадстаўнікі ўпаўнаважаных органаў і энергетычных кампаній еўразійскай "пяцёркі" знайшлі кансэнсус па шэрагу пытанняў, што патрабуюць першачарговага ўрэгулявання для падрыхтоўкі правіл функцыянавання агульнага электраэнергетычнага рынку Еўразійскага эканамічнага саюза", - праінфармавалі ў ЕЭК. У прыватнасці, станоўчы рэзультат дасягнуты ў пытаннях транзіту электраэнергіі, не звязанага з яе гандлем на агульнасаюзным рынку. На пасяджэнні размова ішла аб уліку і рэгуляванні такой міждзяржаўнай перадачы электраэнергіі. Таксама краіны ЕАЭС абмеркавалі ідэю стварэння аператара агульнага электраэнергетычнага рынку і пагадзіліся, што вывучэнне ініцыятывы прадстаўнікоў Казахстана будзе прадоўжана.
"Разам з тым члены Кансультатыўнага камітэта па электраэнергетыцы адобрылі праект плана мерапрыемстваў па рэалізацыі стратэгічных напрамкаў развіцця еўразійскай эканамічнай інтэграцыі да 2025 года ў частцы, што датычыцца фарміравання агульнага электраэнергетычнага рынку ЕАЭС, і разгледзелі магчымасць стварэння Савета кіраўнікоў упаўнаважаных органаў дзяржаў-членаў у сферы энергетыкі", - дадалі ў прэс-службе.-0-
