Законапраект "Аб змяненні Бюджэтнага кодэкса Рэспублікі Беларусь" рыхтуецца да другога чытання. Як чакаецца, у Авальнай зале ён будзе разгледжаны ў лютым. Аб навацыях дакумента карэспандэнту БЕЛТА расказаў член Пастаяннай камісіі па бюджэце і фінансах Палаты прадстаўнікоў Сяргей Сцельмашок.
У першым чытанні законапраект быў прыняты дэпутатамі 27 чэрвеня і сур'ёзна да другога чытання не зменіцца.
"Праект закона падрыхтаваны ў мэтах прывядзення Бюджэтнага кодэкса ў адпаведнасць са змяненнямі і дапаўненнямі Канстытуцыі Рэспублікі Беларусь, прынятымі на рэспубліканскім рэферэндуме 27 лютага 2022 года. Акрамя таго, уносяцца кропкавыя змяненні ў Бюджэтны кодэкс для прывядзення яго асобных артыкулаў у адпаведнасць з ужо дзеючым цяпер заканадаўствам, якія даюць магчымасць у існуючых эканамічных умовах забяспечыць устойлівае і збалансаванае выкананне бюджэту", - расказаў Сяргей Сцельмашок.
Дакумент прадугледжвае шэраг навел. "Так, узнікае аб'ектыўная неабходнасць ва ўрэгуляванні бюджэтных адносін і фінансаванні ўзнікаючых абавязацельстваў у бягучым годзе, звязаных не толькі з удакладненнем асобных паказчыкаў бюджэту, але, напрыклад, тых, што патрабуюць карэкціроўкі напрамку выкарыстання бюджэтных сродкаў, - адзначыў дэпутат. - Для аператыўнага вырашэння такіх пытанняў прадугледжваецца норма аб прадастаўленні адпаведных паўнамоцтваў кіраўніку дзяржавы. У прыватнасці, Прэзідэнту даюцца паўнамоцтвы на змяненні Бюджэтнага кодэкса ў рамках бягучага года. З гэтага часу кіраўнік дзяржавы будзе мець права ў рамках бягучага года змяняць бюджэт і, адпаведна, пераносіць на пэўныя артыкулы расходы, якія непасрэдна неабходны".
"У дакуменце таксама прадугледжана крымінальная адказнасць за наўмысныя неналічэнне і нявыплату абавязковых страхавых узносаў, узносаў на прафесійнае пенсійнае страхаванне ў бюджэт дзяржаўнага пазабюджэтнага фонду сацыяльнай абароны насельніцтва Рэспублікі Беларусь. Раней крымінальная адказнасць за названыя парушэнні прадугледжана не была, - удакладніў Сяргей Сцельмашок. - Акрамя таго, пры выкананні фарміравання бюджэту Міністэрства фінансаў і адпаведныя тэрытарыяльныя органы будуць выкарыстоўваць праграмнае забеспячэнне - праграмна-тэхнічныя комплексы і сродкі аўтаматызаванай сістэмы фінансавых расследаванняў Міністэрства фінансаў".
Законапраект прадугледжвае залічэнне штрафаў ад неплацельшчыкаў у Фонд сацыяльнай абароны насельніцтва ў частцы страхавых узносаў. З гэтага часу такія штрафы будуць залічацца непасрэдна ў Фонд сацыяльнай абароны, а не ў рэспубліканскі бюджэт, як было да гэтага. "Нявыкарыстаныя астаткі бюджэтных сродкаў на рахунках арганізацый пасля завяршэння фінансавага года пералічваюцца ў даход адпаведнага бюджэту, у тым ліку дзяржаўнага мэтавага бюджэтнага фонду, уключаючы інавацыйны фонд, а таксама дзяржаўны пазабюджэтны фонд", - дапоўніў парламентарый.
"Да работы над законапраектам прыцягвалася Міністэрства фінансаў і Нацыянальны цэнтр заканадаўства і прававых даследаванняў. У НЦЗПД былі свае заўвагі. Пасля прыняцця законапраекта ў першым чытанні пры падрыхтоўцы да другога мы праводзілі пасяджэнне Пастаяннай камісіі, дзе абмеркавалі прапановы і заўвагі, якія паступілі, - дапоўніў Сяргей Сцельмашок. - Законапраект знаходзіцца ў высокай стадыі гатоўнасці і будзе разгледжаны на пасяджэнні сесіі ў лютым".
Святлана СУХАРКО,
БЕЛТА.-0-
