1 лістапада, Мінск /Кар. БЕЛТА/. Дар'я Домрачава далучыцца да зборнай Беларусі па біятлоне на заключным этапе падрыхтоўкі да сезона ў нарвежскім Шушэне, паведамляе карэспандэнт БЕЛТА.
На гэты момант трохразовая алімпійская чэмпіёнка Сочы-2014 завяршае трэніроўкі ў Італіі. Жаночая каманда пад кіраўніцтвам Фёдара Свабоды паспрабавала свае сілы ў канцы кастрычніка на першым снезе ў фінскім Вуакаці, а апошнія дні правяла ў "Раўбічах", біятланісткі прыбудуць у Шушэн 4 лістапада.
Мужчынская каманда ўжо завяршыла трэніроўкі ў Ханты-Мансійску, дзе знаходзілася з 13 кастрычніка разам са старшым трэнерам Васілём Бальшаковым і старшым трэнерам па развіцці віду спорту Юрыем Альберсам, і пераедзе ў Нарвегію. Першыя старты сезона для беларускіх біятланістаў адбудуцца менавіта ў Шушэне, дзе 23 лістапада пройдзе першы этап Кубка IBU.
Кубак свету па біятлоне сезона 2017/2018 стартуе ў шведскім Эстэрсундзе 26 лістапада. Зімовыя Алімпійскія гульні, якія пройдуць з 9 па 25 лютага 2018 года, прыме паўднёвакарэйскі Пхёнчхан.-0-
