9 лістапада, Мінск /Кар. БЕЛТА/. Аснашчэнне раддамоў і кваліфікацыя медыцынскіх работнікаў у Беларусі знаходзяцца на сусветным узроўні. Такое меркаванне карэспандэнту БЕЛТА выказаў прафесар заснавальнік і старшыня Сусветнага кангрэса па спрэчных пытаннях акушэрства, гінекалогіі і праблемах бясплоддзя (Ізраіль) Зіён Бэн Рафаэль пасля наведвання радзільнага дома УАЗ "5-я гарадская клінічная бальніца" Мінска.
"Я ўражаны ўзроўнем аснашчэння, ведаў дактароў і тым, як даглядаюць дзяцей", - адзначыў Зіён Бэн Рафаэль. Адным з дасягненняў рэспублікі прафесар назваў дзяржаўную сістэму аховы здароўя. Дзякуючы гэтаму атрыманне кваліфікаванай меддапамогі даступна кожнаму грамадзяніну.
Ён таксама закрануў некалькі актуальных для сусветнай супольнасці пытанняў. У прыватнасці, размова ішла аб павелічэнні ўзросту жанчын, якія нараджаюць першае дзіця. Гэта тэндэнцыя характэрна як для Заходняй, так і Усходняй Еўропы - пачынаючы ад Расіі і завяршаючы Партугаліяй, Італіяй. Прычым узрост жанчын пры нараджэнні першага дзіцяці з кожным дзесяцігоддзем павялічваецца прыкладна на 2 гады. "Калі ў мой час нормай было 22-23 гады, то цяпер па ўсёй Еўропе мы часта назіраем першародзячых жанчын ва ўзросце старэйшым за 30, часта гэта 34-40 гадоў", - дадаў Зіён Бэн Рафаэль. У той жа час для росту эканомікі і ўзнаўлення насельніцтва ўзровень нараджальнасці павінен перавышаць 2 дзіцяці на адну жанчыну. Таму дзяржаве неабходна больш увагі ўдзяляць матываванню моладзі на нараджэнне дзяцей у больш раннім узросце.
Пры гэтым, паводле слоў прафесара, забарона абортаў не прывядзе да павышэння нараджальнасці. У Ізраілі дзейнічае сістэма пад назвай "Адкрытыя дзверы": для падлеткаў прадугледжаны бясплатныя кансультацыі акушэраў-гінеколагаў. На такіх кансультацыях, якія праходзяць без прысутнасці бацькоў, спецыяліст падрабязна расказвае аб кантрацэпцыі. Вялікая ўвага таксама ўдзяляецца прапагандзе планавання сям'і. Дзякуючы гэтаму ўдалося значна знізіць падлеткавую цяжарнасць і колькасць абортаў.
Зіён Бэн Рафаэль прыбыў у Мінск для ўдзелу ў X З'ездзе акушэраў-гінеколагаў і неанатолагаў Беларусі, які пройдзе 9-10 лістапада. Удзельнікамі з'езда стануць не толькі ўрачы з усёй рэспублікі, але і спецыялісты блізкага і далёкага замежжа, у тым ліку Партугаліі, Германіі, Ізраіля. У час секцый і круглых сталоў плануецца ўзняць тэмы арганізацыі аказання дапамогі маці і дзіцяці, захавання і ўмацавання рэпрадуктыўнага патэнцыялу, гінекалогіі ў розныя ўзроставыя перыяды, праблем сучаснай неанаталогіі.-0-
