24 кастрычніка, Мінск /Кар. БЕЛТА/. Фіналіст рэспубліканскага маладзёжнага праекта БРСМ "100 ідэй для Беларусі" аспірант Гомельскага дзяржаўнага ўніверсітэта імя Францыска Скарыны Аляксей Зайцаў з аўтарскім праектам "Хутар Мебіуса" заваяваў сярэбраны медаль у фінале V Міжнароднага конкурсу "Інтэрнэт+" па інавацыях і прадпрымальніцтве сярод студэнтаў і выпускнікоў вышэйшых навучальных устаноў у намінацыі IoT у Кітаі, паведаміў карэспандэнту БЕЛТА другі сакратар ЦК БРСМ Алег Дзікун.
Распрацоўка маладога наватара прадугледжвае стварэнне аўтаномнай станцыі SMF-02, якую можна выкарыстоўваць на сельскагаспадарчых участках з дапамогай устройства дыстанцыйнага кантролю. Спецыяльная праграма дае магчымасць акумуляваць энергію сонца, ветру для збору метэаралагічных паказанняў і выкарыстання сістэм засцярогі вырошчвальных культур. Праект вельмі актуальны для выкарыстання ў сельскагаспадарчай галіне і дае магчымасць забяспечыць маніторынг сіламі аднаго-двух аператараў росту сельскагаспадарчых культур.
Варта заўважыць, што прапанаваны беларускім распрацоўшчыкам механізм перадачы інфармацыі пры дапамозе датчыкаў і лагістычнай схемы ў 10-12 разоў таннейшы за аналагі ў Заходняй Еўропе і ЗША. Вялікі плюс прапанаванай сістэмы ў самадастатковасці. "У прыватнасці, яна да пяці гадоў можа працаваць без карэкцыі або тэхнічнага суправаджэння і падзарадкі. Акрамя таго, пасля счытвання і перадачы інфармацыі датчык аўтаматычна адключаецца і пераходзіць у спячы рэжым, каб сэканоміць свой рэсурс і энергію. Праводзячы маніторынг росту раслін, з дапамогай гэтай сістэмы можна вызначаць і патрэбнасці мінеральных угнаенняў: калі і колькі іх неабходна выкарыстоўваць, каб рост адпавядаў планам і нормам, якія былі заяўлены", - расказаў Алег Дзікун.
У час конкурсу фармат ацэнкі аўтарскіх работ значна адрозніваўся ад агульнапрынятага. "Прэзентацыі праектаў праходзілі анлайн, а работа журы і экспертаў праводзілася на аддаленым доступе ў спецыяльна абсталяваных аўдыторыях, каб ніхто не мог аказаць уплыву на вынікі конкурсу. На кожнай пляцоўцы ў сярэднім журы ацэньвала па 15-20 праектаў. Для зручнасці работы журы было абсталявана каля 45 спецыяльных незалежных пляцовак па розных трэках, куды ажыццяўлялася анлайн-трансляцыя з месца прэзентацыі", - адзначыў другі сакратар.
У трэку, дзе беларус прадстаўляў свой праект, удзельнічала 20 распрацоўшчыкаў, у тым ліку з Кембрыджскага, Сіднейскага, Таронтскага ўніверсітэтаў і інстытутаў свету. "Дыстанцыйна нашаму прадстаўніку быў зададзены шэраг пытанняў, якія могуць узнікнуць пры перадачы сігналу ад аператара да датчыка і назад. Дарэчы, у распрацоўцы гэта ўсё прадумана і закладзена з запасам да 45 км, нягледзячы на тое, што ўстановачная магутнасць датчыкаў значыцца да 30 км", - дадаў Алег Дзікун.
Фінал V Міжнароднага конкурсу "Інтэрнэт+" праходзіў у кітайскім горадзе Ханчжоу 12-15 кастрычніка з удзелам амаль 6 тыс. чалавек і прэзентацыяй 1492 аўтарскіх праектаў. Непасрэдна адборачныя туры конкурсу праводзіліся з сакавіка па кастрычнік, а сам конкурс у бягучым годзе стаў міжнародным, аб'яднаў маладых прадпрымальнікаў з усяго свету і ўстанавіў новы рэкорд па колькасці ўдзельнікаў - 4,5 млн студэнтаў і 1 млн каманд з 3343 універсітэтаў і каледжаў 124 краін.
Арганізатарам конкурсу з 2015 года з'яўляецца Міністэрства адукацыі КНР. Спецыяльна запрошаным суарганізатарам у гэтым годзе выступіў БРСМ, што стала магчыма дзякуючы супрацоўніцтву маладзёжнай арганізацыі з Усекітайскай федэрацыяй моладзі. Прадстаўнікі Беларусі ўвайшлі ў склад журы, а арганізацыя ўпершыню прэзентавала ў Кітаі рэспубліканскі маладзёжны праект "100 ідэй для Беларусі".
Пераможцам конкурсу "Інтэрнэт+" уручаны 15 залатых і 45 сярэбраных медалёў. Галоўная задача праекта - стымуляваць цікавасць студэнтаў ВНУ да інавацый і прадпрымальніцтва, садзейнічаць інтэграцыі адукацыі ў гэтай галіне. Важны складнік мерапрыемства - стварэнне платформы для міжнароднага супрацоўніцтва студэнтаў у вырашэнні глабальных праблем.-0-
