15 кастрычніка, Мінск /Кар. БЕЛТА/. Фармат правядзення чарговага пасяджэння Вышэйшага дзяржсавета Саюзнай дзяржавы вызначаць з улікам эпідабстаноўкі, заявіў журналістам дзяржсакратар Саюзнай дзяржавы Дзмітрый Мезенцаў. Сёння ён прыняў удзел у пасяджэнні Савета кіраўнікоў дзяржаў СНД, паведамляе карэспандэнт БЕЛТА.
"Давайце будзем улічваць рэальную эпідэміялагічную абстаноўку. Нават сёння відэафармат, які быў выбраны кіраўнікамі дэлегацый, кіраўнікамі дзяржаў СНД, ніколькі не зменшыў маштаб і глыбіню дыскусіі", - сказаў Дзмітрый Мезенцаў.
На пытанне журналіста, ці адбудзецца ВДС 4 лістапада, дзяржсакратар адказаў: "Дайце нам яшчэ крыху часу. Мы ўсё скажам".
Дзмітрый Мезенцаў падкрэсліў, што Пастаянны камітэт Саюзнай дзяржавы ва ўзаемадзеянні з урадамі Расіі, Беларусі, рэспубліканскімі, федэральнымі міністэрствамі і ведамствамі рыхтуе тыя прапановы, якія будуць разгледжаны ў рамках пасяджэння Вышэйшага дзяржаўнага савета. "Вядома, этапным для Саюзнай дзяржавы было пасяджэнне Савета Міністраў Саюзнай дзяржавы, якое прайшло ў Мінску ў пачатку верасня, падпісанне тых дакументаў, што фактычна адобрылі прапановы, якія будуць вынесены на разгляд Прэзідэнта Беларусі Аляксандра Лукашэнкі і Прэзідэнта Расіі Уладзіміра Пуціна, - дадаў ён. - Вызначаць прэзідэнты далейшы шлях развіцця, падпісаўшы і зацвердзіўшы 28 саюзных праграм, значыць, яны вызначаць зусім іншы ўзровень з'яднанасці ў эканамічнай сферы прамысловых, эканамічных, фінансавых патэнцыялаў Беларусі і Расіі. Мы гэтым падкрэсліваем новы этап у развіцці Саюзнай дзяржавы і рэалізацыі вялікага патэнцыялу саюзнага дагавора. Мы ў гэта верым, мы гэтага чакаем і прапануем вам уважліва глядзець за гэтай работай".-0-
