27 верасня, Мінск /Святлана Міховіч - БЕЛТА/. Інфармацыя аб радыяцыйнай абстаноўцы ў раёне БелАЭС будзе размяшчацца ў інтэрнэце, паведаміла сёння першы намеснік міністра прыродных рэсурсаў і аховы навакольнага асяроддзя Ія Малкіна ў час анлайн-канферэнцыі на сайце БЕЛТА.
"У зоне назірання Беларускай АЭС (радыус 12,9 км) і на прылеглай тэрыторыі ў радыусе 30 км і больш пад эгідай Мінпрыроды ствараецца аўтаматызаваная шматузроўневая і шматфункцыянальная сістэма кантролю радыяцыйнай абстаноўкі (АСКРА). Інфармацыя аб радыяцыйнай абстаноўцы ў раёне атамнай станцыі будзе размяшчацца ў сетцы Інтэрнэт", - растлумачыла яна.
Ія Малкіна адзначыла, што цяпер у зоне назірання БелАЭС функцыянуе базавы комплекс АСКРА. Апаратура гэтага комплексу ў складзе трох аўтаматычных пунктаў вымярэння (АПВ) размешчана ў населеных пунктах Гервяты, Міхалішкі, Трокенікі.
АПВ ажыццяўляе збор, папярэднюю апрацоўку і перадачу інфармацыі аб магутнасці дозы гама-выпрамянення, энергетычным спектры гама-выпрамянення і метэаралагічных параметрах кожныя 10 мінут. Яшчэ 7 АПВ устаноўлена за зонай назірання Беларускай АЭС, цяпер яны знаходзяцца ў доследнай эксплуатацыі.
"У рэжыме нармальнага функцыянавання АЭС АСКРА прызначана для атрымання і апрацоўкі інфармацыі аб радыяцыйнай абстаноўцы. У выпадку надзвычайных сітуацый яна будзе выкарыстоўвацца для аператыўнай ацэнкі маштабаў радыеактыўнага забруджвання для прыняцця кіраўніцкіх рашэнняў. Плануецца, што інфармацыя аб узроўнях магутнасці дозы гама-выпрамянення ў раёне размяшчэння БелАЭС будзе перадавацца ў Еўрапейскі цэнтр збору інфармацыі аб радыяцыйнай абстаноўцы ва ўстаноўленых фарматах", - падкрэсліла Ія Малкіна.
Першы намеснік міністра таксама нагадаў, што для ацэнкі фонавага стану навакольнага асяроддзя вакол будуемай станцыі Мінпрыроды ў асобе Гідрамета з 2009 года вядзе радыяцыйна-экалагічны маніторынг. Аб'ектамі маніторынгу з'яўляюцца ў тым ліку атмасфернае паветра, снежнае покрыва, паверхневыя воды, донныя адклады, глебы.-0-
