21 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка лічыць нездавальняючай работу па стварэнні Кітайска-беларускага індустрыяльнага парка "Вялікі камень". Аб гэтым кіраўнік дзяржавы заявіў у Пасланні беларускаму народу і Нацыянальнаму сходу, паведамляе БЕЛТА.
"Работа (па стварэнні Кітайска-беларускага індустрыяльнага парка "Вялікі камень". - Заўвага БЕЛТА) вядзецца вельмі дрэнна. У бліжэйшы час там будуць прыняты вельмі строгія меры, у тым ліку кадравыя", - адзначыў Аляксандр Лукашэнка.
Паводле яго слоў, на тэрыторыі парка павінны быць створаны прадпрыемствы паслязаўтрашняга дня. "Прадпрыемствам учарашняга і сённяшняга дня на гэтай пляцоўцы няма чаго рабіць. Ведаеце, па якіх прычынах? Перш за ўсё, прадукцыю мы не зможам рэалізаваць тут, у Еўрапейскім саюзе і свеце наогул", - растлумачыў Прэзідэнт.
Ён падкрэсліў, што цяпер Беларусь актыўна шукае новыя кропкі росту эканомікі, якія дадуць устойлівую дынаміку яе развіцця. Кітайска-беларускі індустрыяльны парк павінен стаць такой кропкай. "Тут ствараецца пляцоўка для прыцягнення высокатэхналагічных і канкурэнтаздольных праектаў", - сказаў Аляксандр Лукашэнка.-0-
