5 кастрычніка, Мінск /Міхаіл Маціеўскі - БЕЛТА/. Беларусі і Венесуэле неабходна зрабіць рашучы крок наперад у развіцці адносін. Аб гэтым Прэзідэнт Беларусі Аляксандр Лукашэнка заявіў сёння на перагаворах з Прэзідэнтам Венесуэлы Нікаласам Мадурам у вузкім складзе, перадае карэспандэнт БЕЛТА.
"Сутнасць цяперашняй нашай сустрэчы ў тым, што нам трэба рашуча зрабіць добры новы крок наперад у развіцці нашых адносін", - сказаў Аляксандр Лукашэнка.
Прэзідэнт падкрэсліў, што беларускі бок гатовы да гэтага.
Сустрэча двух лідараў праходзіць спачатку ў фармаце сам-насам. Затым да кіраўнікоў дзяржаў далучацца члены прадстаўнічых дэлегацый. Бакі разгледзяць шырокі комплекс пытанняў гандлёва-эканамічнага супрацоўніцтва, у тым ліку рэалізацыю двухбаковых праектаў, функцыянаванне сумесных зборачных вытворчасцей, развіццё ўзаемадзеяння ў сельскагаспадарчай, будаўнічай, нафтагазавай і іншых сферах.-0-