12 лістапада, Мінск /Кар. БЕЛТА/. У Індыі сёння пачалі дзейнічаць новыя правілы ўезду ў краіну для замежных турыстаў. Аб гэтым паведамляецца на сайце Міністэрства аховы здароўя і падтрымкі сям'і Індыі.
Згодна з правіламі, перад плануемым прылётам у Індыю "ўсе падарожнікі павінны запоўніць форму на партале www.newdelhiairport.in", таксама загрузіць на афіцыйны сайт аэрапорта Нью-Дэлі адмоўны ПЛР-тэст на COVID-19, зроблены не раней чым за 72 гадзіны да прыбыцця ў Індыю. У Міністэрстве аховы здароўя папярэдзілі, што прадастаўленне несапраўдных звестак "падлягае крымінальнаму праследаванню".
Акрамя таго, у пасажыраў да і пасля пасадкі будуць мераць тэмпературу. Калі пасля прыбыцця ў Індыю ў замежнага турыста будуць выяўлены сімптомы захворвання, то ён будзе адпраўлены на ізаляцыю ў медыцынскую ўстанову. Калі ж у яго будзе пасля праверкі станоўчы ПЛР-тэст на COVID-19, то ён і ўсе людзі, якія кантактавалі з ім, будуць змешчаны на каранцін. Згодна з новымі правіламі, тэст на COVID-19 не спатрэбіцца дзецям да пяці гадоў.
Як паведамляе ТАСС, Міністэрства ўнутраных спраў Індыі з 15 кастрычніка пачало выдаваць турыстычныя візы замежным грамадзянам, якія прыбываюць у краіну чартарнымі рэйсамі. З сакавіка 2020 года Індыя была закрыта для турыстаў з-за пандэміі COVID-19.-0-