31 жніўня, Нур-Султан /БЕЛТА - КАЗІНФАРМ/. Прэзідэнт Казахстана Касым-Жамарт Такаеў прыняў адстаўку міністра абароны краіны Нурлана Ермекбаева пасля ўзрываў на складзе ваеннай часці ў Жамбылскай вобласці на поўдні Казахстана.
"Прэзідэнт Касым-Жамарт Такаеў, разгледзеўшы рапарт міністра абароны Нурлана Ермекбаева з просьбай аб адстаўцы, прыняў яе", - паведаміў у Facebook прэс-сакратар Прэзідэнта Казахстана.
Раней у прэс-службе Мінабароны Казахстана паведамілі аб тым, што кіраўнік ведамства Нурлан Ермекбаеў гатовы падаць у адстаўку пасля ліквідацыі наступстваў узрываў, што адбыліся ў Жамбылскай вобласці.
У выніку пажару і наступных узрываў 15 чалавек загінулі, 98 пацярпелі. Сярод пацярпелых каля 50 супрацоўнікаў МНС, якія атрымалі раненні і траўмы.
Паведамленне аб узгаранні склада боепрыпасаў в/ч нумар 28349 (інжынерна-сапёрная брыгада) Міністэрства абароны Казахстана паблізу сяла Кайнар Байзакскага раёна паступіла ўвечары 26 жніўня. Пажар прывёў да больш як 10 узрываў. У сувязі з гэтым была арганізавана эвакуацыя жыхароў бліжэйшых населеных пунктаў.-0-
