28 студзеня, Пекін /БЕЛТА - Сіньхуа/. Кітаю пад сілу атрымаць перамогу ў барацьбе з успышкай каранавіруса новага тыпу 2019-nCoV. Упэўненасць у гэтым выказаў старшыня КНР Сі Цзіньпін на сустрэчы ў Доме народных сходаў у Пекіне з генеральным дырэктарам Сусветнай арганізацыі аховы здароўя Тэдросам Аданамам Гебрэісусам.
Сі Цзіньпін падкрэсліў, што бяспека жыцця людзей і іх здароўе заўсёды стаяць на першым месцы, таму цяпер важней за ўсё прадухіліць і паставіць пад кантроль успышку каранавіруса.
Паводле слоў Сі Цзіньпіна, Кітай вітае ўдзел СААЗ у прадухіленні распаўсюджвання эпідэміі. КНР гатова працаваць разам з СААЗ і ўсёй сусветнай супольнасцю для абароны рэгіянальнай і глабальнай бяспекі ў галіне грамадскай аховы здароўя.-0-