4 мая, Мінск /Кар. БЕЛТА/. Еўракамісія (ЕК) сфарміравала новы пералік санкцыйных абмежаванняў супраць Расіі. Ён будзе ўключаць паэтапную адмову ад паставак нафты з РФ, адключэнне ад SWIFT трох расійскіх банкаў, спыненне трансляцыі ў краінах Еўрасаюза трох расійскіх дзяржтэлеканалаў, заявіла кіраўнік ЕК Урсула фон дэр Ляен, паведамляе ТАСС.
Паводле яе слоў, новыя абмежаванні будуць разгледжаны краінамі - членамі ЕС, да канца тыдня наконт іх будзе вынесена рашэнне.
Канкрэтныя прапановы ЕК па адмове ад расійскай нафты пакуль не называюцца. Аднак шэрагам еўрапейскіх СМІ была распаўсюджана інфармацыя, што ЕК прапануе адмовіцца ад нафты з РФ праз шэсць месяцаў, а ад нафтапрадуктаў - у наступным годзе. Таксама адзначаецца, што для Венгрыі і Славакіі могуць быць прадугледжаны выключэнні: гэтым краінам дазволяць імпартаваць нафту з РФ да канца 2023 года.
Урсула фон дэр Ляен паведаміла, што тры расійскія банкі, у тым ліку Ашчадны банк, плануецца адключыць ад SWIFT. Таксама будзе ўведзена забарона на трансляцыю трох расійскіх тэлеканалаў.
У чарговы санкцыйны пакет ЕС прапануецца ўнесці "ваенных чыноўнікаў і іншых асоб", якіх Брусель лічыць адказнымі "за ваенныя злачынствы ў Бучы", заявіла Урсула фон дэр Ляен.
Акрамя таго, французскае інфармагенцтва Agence France-Presse паведаміла, што пад санкцыі можа трапіць патрыярх Кірыл, а таксама члены сям'і прэс-сакратара прэзідэнта РФ Дзмітрыя Пяскова.-0-
