26 кастрычніка, Мінск /Кар. БЕЛТА/. Эпіцэнтр успышкі COVID-19 у апошнія тыдні перамясціўся з Амерыкі ў Еўропу. Сітуацыя пагаршаецца як у заходняй, так і ва ўсходняй яе частцы, а Францыя ўвайшла ў першую пяцёрку краін свету па колькасці заражаных. Улады еўрапейскіх краін вымушаны звяртацца да ўсё больш строгіх абмежаванняў, паведамляе ТАСС.
У Іспаніі з 25 кастрычніка на паўгода ўведзены нацыянальны рэжым павышанай гатоўнасці, які прадугледжвае дзеянне каменданцкай гадзіны з 23.00 да 6.00. Акрамя таго, рэгіянальныя ўлады могуць уводзіць уласныя меры, напрыклад, абмяжоўваць уезд і выезд.
У Бельгіі забаронена выходзіць на вуліцу з 23.00 да 5.00, закрыты ўсе кафэ і рэстараны, маскі абавязковы ва ўсіх грамадскіх месцах. У Бруселі нашэнне масак паўсюднае, а каменданцкая гадзіна доўжыцца на дзве гадзіны больш - з 22.00 да 6.00.
У Чэхіі дзейнічае рэжым надзвычайнага становішча, аднак улады разглядаюць магчымасць яго ўзмацнення. Ужо закрыты школы, установы грамадскага харчавання, большасць магазінаў. За парушэнне масачнага рэжыму прадугледжаны штраф.
Узмацніць каранцінныя меры плануюць і ў Францыі, дзе ў большасці гарадоў ужо дзейнічае каменданцкая гадзіна з 21.00 да 6.00 і абавязкова нашэнне масак.
Каменданцкая гадзіна дзейнічае і ў асобных абласцях Італіі. Ва ўсёй жа краіне з 26 кастрычніка закрываецца большая частка спартыўных і забаўляльных устаноў, а пунктам грамадскага харчавання прадпісана закрывацца пасля 18.00.
Улады Польшчы з 24 кастрычніка закрылі ўсе ўстановы грамадскага харчавання. Пенсіянераў старэйшых за 70 гадоў просяць заставацца дома, а падлеткам да 16 гадоў забаранілі выходзіць на вуліцу без дарослых. Кіраўніцтва краіны не выключае магчымасці поўнага каранціну і закрыцця граніц.
Францыя выйшла на другое месца ў свеце па сутачным прыросце колькасці інфіцыраваных (81,4 тыс.), уступаючы па гэтым паказчыку толькі ЗША.
Максімумы па колькасці заражаных у суткі абнавілі Вялікабрытанія (больш за 20 тыс.), Іспанія (21 тыс.), Італія (21,4 тыс.), Германія (14,7 тыс.), Бельгія (17,7 тыс.), Нідэрланды (10,2 тыс.). У Чэхіі і Польшчы захваральнасць у параўнанні з веснавой успышкай вырасла ў два разы - да 12,5 тыс. і 11,7 тыс. інфіцыраваных у суткі адпаведна.
Згодна з падлікамі амерыканскага Універсітэта Джонса Хопкінса, у свеце з пачатку пандэміі больш за 43 млн чалавек заразіліся COVID-19, памерлі больш за 1,15 млн заражаных.-0-
