20 красавіка, Мінск /Кар. БЕЛТА/. Гандбалісткі жаночай зборнай Беларусі прымуць сёння каманду Чарнагорыі ў матчы за права згуляць у фінале чэмпіянату свету, паведамляе карэспандэнт БЕЛТА.
Каб прабіцца ў лік 32 лепшых каманд планеты, беларускам трэба прыкласці максімум намаганняў, бо ў мінулую пятніцу ў Падгорыцы яны пацярпелі паражэнне з розніцай на шэсць мячоў - 23:29. Сённяшняя сустрэча на пляцоўцы мінскай "Чыжоўка-Арэны" пачнецца ў 18.00 і будзе паказана ў прамым эфіры тэлеканала "Беларусь 5".
Вынікі астатніх першых матчаў накаўт-раўнда, якія адбыліся на мінулым тыдні: Венгрыя - Італія - 46:19, Турцыя - Расія - 23:35, Аўстрыя - Польшча - 29:29, Славенія - Ісландыя - 24:14, Украіна - Швецыя - 14:28, Славакія - Сербія - 19:26, Румынія - Паўночная Македонія - 33:22, Чэхія - Швейцарыя - 27:27, Партугалія - Германія - 27:32.
Пераможцы плэй-оф атрымаюць пуцёўкі ў фінальную частку 25-га жаночага сусветнага першынства, якое пройдзе 2-19 снежня ў Іспаніі з удзелам 32 каманд з усіх кантынентаў. Без адбору там выступяць гаспадыні турніру - іспанкі, дзеючы чэмпіён планеты - Нідэрланды, а таксама чатыры лепшыя каманды еўрапейскага чэмпіянату 2020 года - Нарвегія, Францыя, Харватыя і Данія.-0-