25 сакавіка, Мінск /Кар. БЕЛТА/. Беларускія атлеты заваявалі 5 медалёў (3 залатыя і 2 бронзавыя) на юніёрскім Кубку Еўропы (U-21) па дзюдо, які прайшоў 23-24 сакавіка ў Афінах, паведамляе карэспандэнт БЕЛТА.
У другі дзень спаборніцтваў бронзавымі ўзнагародамі вызначыліся Аляксандр Сідорык (вагавая катэгорыя - 90 кг) і Жанна Асіповіч (70 кг).
Як паведамлялася раней, у першы дзень спаборніцтваў на вышэйшую прыступку п'едэстала гонару падымаліся Руслан Галавачоў (60 кг), Дзмітрый Мужайла (66 кг) і Ягор Трухан (73 кг).
У агульнакамандным заліку беларуская каманда заняла першае месца, на другім месцы размясцілася турэцкая зборная (2 залатыя, 3 сярэбраныя і 5 бронзавых узнагарод), на трэцім - дзюдаісты з Косава (2 залатыя і 1 бронзавы медалі).
Удзел у юнацкім Кубку Еўропы па дзюдо прынялі больш за 360 атлетаў з 26 краін свету.
Дзюдо ўваходзіць у праграму II Еўрапейскіх гульняў у Мінску. У чэрвені 2019 года ў "Чыжоўка-Арэне" будуць разыграны 15 камплектаў узнагарод у гэтым відзе спорту.-0-
