5 снежня, Мінск /Кар. БЕЛТА/. За мінулыя суткі, 4 снежня, калі на дарогах Беларусі адзначаўся моцны галалёд, не зарэгістравана цяжкіх ДТЗ, у якіх бы загінулі людзі. Вадзіцелі прыслухаліся да рэкамендацый ДАІ. Афіцыйны прадстаўнік УДАІ МУС Беларусі Ганна Банадык заклікала і пешаходаў быць уважлівымі і асцярожнымі на слізкай дарозе, паведамляе БЕЛТА.
Афіцыйны прадстаўнік УДАІ МУС адзначыла, што пешаходам лепш чакаць дазвольнага сігналу святлафора або грамадскага транспарту далей ад краю праезнай часткі, каб не саслізнуць пад колы. "Нават калі пешаходам гарыць зялёнае святло, трэба дачакацца, пакуль усе машыны спыняцца, і толькі пасля гэтага пачынаць пераход, бо прыпыначны шлях любога транспартнага сродку на слізкай дарозе павялічваецца ў разы", - нагадала Ганна Банадык. Яна таксама заклікала пешаходаў быць уважлівымі на дарогах, а ў цёмны час сутак абавязкова абазначаць сябе святловяртальнымі элементамі.
Усяго за 4 снежня ў краіне здарылася 330 ДТЗ з матэрыяльным уронам (гэта крыху вышэй за сярэдні паказчык, звычайна за суткі ў краіне іх фіксуецца каля 300). Зарэгістравана 16 ДТЗ, у якіх 20 чалавек атрымалі траўмы. Ганна Банадык звярнула ўвагу, што сярод пацярпелых чатыры дзіцяці. Два ДТЗ здарыліся раніцай у Брэсце. У 7.20 на нерэгулюемым пешаходным пераходзе збілі хлопчыка 2004 года нараджэння. Дзве дзяўчынкі, 2010 і 2004 гадоў нараджэння, прыкладна ў 8.00 пацярпелі ў сутыкненні аўтамашын "Лексус" і "Вольва". Днём каля 14.00 у Гродне на рэгулюемым пераходзе збілі 17-гадовую дзяўчыну.
Ва УДАІ МУС падкрэсліваюць, што пытанне бяспекі дарожнага руху паўстае асабліва востра, калі перапады тэмпературы суправаджаюцца ападкамі. Удзень 5 снежня прагназуецца плюсавая тэмпература, але ўжо ўвечары падмарозіць, у сувязі з гэтым магчыма ўтварэнне галалёдзіцы. Такія дарожныя ўмовы патрабуюць павышанай увагі і асцярожнасці ад усіх удзельнікаў дарожнага руху. У ДАІ нагадваюць аб самым галоўным правіле на слізкай дарозе - ніякіх рэзкіх дзеянняў і манеўраў. Неабходна захоўваць дыстанцыю, выключыць непатрэбныя перамяшчэнні, апярэджванні і асабліва абгоны. Вадзіцелям варта ўлічваць, што ачышчаная і апрацаваная процігалалёдным саставам дарога не адразу становіцца бяспечнай, патрэбны час і пэўная інтэнсіўнасць руху, каб сумесь пачала выконваць свае функцыі.-0-
