(Абноўлена 13:35)
28 мая, Брэст /Кар. БЕЛТА/. У Брэсце 28 мая стартавала ІІ Міжнародная міжпартыйная канферэнцыя "Дзяржаўны суверэнітэт і прынцыпы міжнародных адносін ва ўмовах шматпалярнасці і разнастайнасці ў XXI стагоддзі", перадае карэспандэнт БЕЛТА.
Канферэнцыя аб'яднала прадстаўнікоў партый з Беларусі і дружалюбных ёй краін. У Брэст прыехалі ўдзельнікі з Азербайджана, Венесуэлы, Германіі, Зімбабвэ, Казахстана, Карэйскай Народна-Дэмакратычнай Рэспублікі, Кубы, Лаоса, Малдовы, М'янмы, Расіі, Таджыкістана, Узбекістана. Іх калегі з Сербіі і Славакіі падключыліся да дыскусіі ў рэжыме анлайн.
Прэзідэнт Рэспублікі Беларусь Аляксандр Лукашэнка накіраваў удзельнікам канферэнцыі прывітальны адрас. Яго зачытаў першы намеснік кіраўніка Адміністрацыі Прэзідэнта Уладзімір Пярцоў.Уладзімір Пярцоў звярнуў увагу, што форум не выпадкова праходзіць у Брэсце. Горад знаходзіцца на заходняй мяжы Беларусі, дзе пераплецены розныя культуры і адбывалася мноства гістарычных падзей. "Напэўна, няма такога другога горада на карце нашай Радзімы, дзе зямля была б так шчодра паліта крывёй. Брэсцкая крэпасць трымалася даўжэй, чым многія іншыя еўрапейскія дзяржавы", - адзначыў ён.
Першы намеснік кіраўніка Адміністрацыі Прэзідэнта падкрэсліў, што чалавецтва жыве ў няпросты час, калі перакройваюцца межы, перапісваецца гісторыя. "Адбываюцца тыя самыя тэктанічныя зрухі паміж асноўнымі буйнымі дзяржавамі або супольнасцямі дзяржаў. Менавіта таму палітычныя партыі як сувязнае звяно паміж народам і ўладай, тыя, хто з'яўляецца лакмусавай паперкай усіх палітычных і грамадскіх працэсаў у сваёй дзяржаве, павінны своечасова чуць сігналы сваіх грамадстваў і рабіць усё магчымае і нават немагчымае для таго, каб тая трагедыя, якая восем дзесяцігоддзяў таму праходзіла на беларускай зямлі, ніколі больш не паўтарылася", - сказаў Уладзімір Пярцоў.
Прадстаўнікі беларускіх і замежных партый сабраліся, каб абмеркаваць актуальныя тэмы. У час пленарнага пасяджэння эксперты падзеляцца меркаваннямі ў пытаннях умацавання суверэнітэту, рэгіянальнага партнёрства, развіцця міжнародных адносін, аб ролі палітычных партый і грамадскіх рухаў у гэтых працэсах.
Першы дзень канферэнцыі пачаўся з цырымоніі ўскладання кветак да Вечнага агню ў мемарыяльным комплексе "Брэсцкая крэпасць-герой". Прысутныя ўшанавалі памяць герояў і ахвяр Вялікай Айчыннай вайны.
Праграма форуму таксама прадугледжвае падпісанне міжнародных дагавораў. Замежныя госці наведаюць "вёскі будучыні", пабываюць на некаторых прадпрыемствах, азнаёмяцца са славутасцямі Беларусі.-0-
Фота Віялеты Южаковай
Падпісвайцеся на нас у
