7 сакавіка, Мінск /Кар. БЕЛТА/. Ордэн Маці - даніна павагі дзяржавы шматдзетным маці. Гэта адзначыў журналістам старшыня Мінскага аблвыканкама Аляксандр Турчын на ўрачыстым мерапрыемстве, прымеркаваным да жаночага свята і ўручэння прадстаўніцам цэнтральнага рэгіёна дзяржаўнай узнагароды - ордэна Маці, перадае карэспандэнт БЕЛТА.
"Кожнае мерапрыемства па ўзнагароджанні шматдзетных маці ордэнам Маці заўсёды вельмі хвалюючае. Маці розныя, але іх аб'ядноўвае адно - вялікая любоў да сваіх дзяцей, паколькі нарадзіць і выхаваць пяцярых і больш дзяцей - гэта на самай справе подзвіг. Ім усім трэба ўдзяліць увагу, зрабіць урокі, забяспечыць догляд, калі яны хварэюць, але самае галоўнае - выхоўваць. Таму гэтыя жанчыны заслугоўваюць вялікай павагі, і дзяржава такой высокай узнагародай, як ордэн Маці, аддае даніну павагі ім, ацэньвае іх уклад у развіццё нашай краіны. Усе гэтыя дзеці - будучыня нашай Беларусі, дастойная будучыня", - адзначыў Аляксандр Турчын.
Ён таксама падкрэсліў, што не можа не радаваць той факт, што ў Мінскай вобласці шматдзетных сем'яў з кожным годам становіцца ўсё больш.
"Мне хацелася б, каб гэты рост быў яшчэ больш хуткім, каб было больш маленькіх грамадзян не толькі ў вобласці, алеі ў краіне ў цэлым. Гэта адна з прыярытэтных задач любой дзяржавы. Усім жанчынам я хачу пажадаць моцнага здароўя, аптымізму і дабрабыту. І каб цёплыя словы ў іх адрас гучалі не толькі сёння, але і кожны дзень", - рэзюмаваў губернатар.
У Мінскай вобласці цяпер налічваецца 21 тыс. 727 шматдзетных сем'яў, у якіх выхоўваецца 70 тыс. 990 непаўналетніх дзяцей. У перыяд з 2011 па 2024 год у вобласці ордэнам Маці былі ўзнагароджаны 2626 жанчын. У 2024 годзе гэту высокую ацэнку матчынай працы атрымалі 45 жыхарак Мінскай вобласці.-0-
Фота Віталя Піваварчыка
