21 мая, Мінск /Кар. БЕЛТА/. Цэнтры бяспекі МНС па ўсёй краіне ўвялі дадатковую форму работы - анлайн-навучанне, паведамілі БЕЛТА ў ведамстве.
"Ратавальнікі запісваюць лекцыі, вядуць прамыя трансляцыі, адказваюць на пытанні гледачоў. Цяпер веды пра бяспеку могуць атрымаць не толькі тыя, хто прыйдзе ў цэнтр, але і аўдыторыя, якая засталася дома", - адзначылі ў МНС.
Напрыклад, у магілёўскім цэнтры бяспекі відэаўрокі дапоўнілі цікавымі скэтч-карцінкамі. Відэа можна знайсці на канале Магілёўскага абласнога ўпраўлення МНС і на афіцыйнай старонцы ў "УКантакце".
У Віцебскай вобласці першую экскурсію па навучальных пляцоўках у супольнасці "УКантакце" правялі на бягучым тыдні. Падпісчыкам расказваюць аб рэспубліканскай акцыі "Не пакідайце дзяцей адных!" і знаёмяць наведвальнікаў цэнтра з навучальнай праграмай. Яна дае магчымасць атрымаць базавыя веды аб асновах бяспечнай жыццядзейнасці, а таксама пабываць на пляцоўцы "Правілы выкліку экстранных службаў".
У Мінскай вобласці таксама арганізавалі відэалекцыі з цэнтра бяспекі ў Барысаве. Сярод актуальных тэм - як правільна выклікаць ратавальнікаў і выкарыстоўваць дадатак "Дапамога побач", што рабіць, калі пачаўся пажар.
Рэгіянальныя цэнтры бяспекі створаны ва ўсіх абласцях рэспублікі. Першы з іх пачаў работу ў 2015 годзе на базе Ліцэя пры Універсітэце грамадзянскай абароны МНС. Былі распрацаваны навучальныя трэнажоры, апаратна-праграмныя комплексы і метадычнае забеспячэнне для навучання детей, створаны 11 інтэрактыўных пляцовак. У сярэднім штогод у цэнтры навучаецца амаль 20 тыс. чалавек. Пра ўсе цэнтры бяспекі можна даведацца на сайце МНС.
Задача цэнтраў - фарміраваць культуру бяспекі як у дзяцей, так і ў дарослых. Апаратна-праграмныя комплексы, трэнажоры з выкарыстаннем тэхналогій дапоўненай рэальнасці, захопу руху, віртуальнай рэальнасці даюць магчымасць мадэліраваць абстаноўку, максімальна набліжаную да сапраўднай.-0-