13 мая, Мінск /Кар. БЕЛТА/. Узроставая група 18-49 гадоў для ўдзелу ў праекце па вывучэнні імунітэту супраць COVID-19 ужо набрана, паведамілі ў прэс-службе Міністэрства аховы здароўя, адказваючы на пытанне карэспандэнта БЕЛТА.
Усяго ў даследаванне будуць уключаны 12 тыс. добраахвотнікаў. Рэгістрацыя для ўдзелу будзе праводзіцца да моманту набору неабходнай колькасці ўдзельнікаў.
У Міністэрстве аховы здароўя адзначылі, што рэгістрацыя і анкетаванне праходзяць анлайн (спасылка размешчана на сайце Міністэрства аховы здароўя), іншыя формы рэгістрацыі не прадугледжаны.
Вывучэнне папуляцыйнага імунітэту да COVID-19 жыхароў Беларусі праводзіць беларускае Міністэрства аховы здароўя сумесна з Расспажыўнаглядам Расійскай Федэрацыі. Добраахвотнікі змогуць здаць свой біялагічны матэрыял (кроў) для даследавання на антыцелы да COVID-19.-0-
