3 лістапада, Мінск /Кар. БЕЛТА/. Медыкі спадзяюцца на зніжэнне агрэсіўнасці каранавіруса з надыходам другой хвалі, паведаміў карэспандэнту БЕЛТА загадчык кафедры інфекцыйных хвароб БДМУ, галоўны пазаштатны інфекцыяніст Міністэрства аховы здароўя, доктар медыцынскіх навук, прафесар Ігар Карпаў.
Паводле назіранняў, цяпер пацыенты пераносяць хваробу ў асноўным гэтак жа, як і ў першую хвалю. Разам з тым урачы спадзяюцца на аблягчэнне ходу захворвання. "Увесь свет думае, што так будзе, паколькі гэта лагічна. Вірус, які спрабуе заняць шмат біялагічных ніш, распаўсюдзіцца, цыркуляваць, звычайна страчвае сваю агрэсіўнасць, уласцівую пандэмічным вірусам", - сказаў Ігар Карпаў.
Тым не менш, паводле яго слоў, страчваць пільнасць і расслабляцца ні ў якім разе нельга. Цяжкіх выпадкаў шмат, хвароба ў пэўных узроставых групах і ў людзей, у якіх ёсць фонавыя паталогіі, праходзіць даволі сур'ёзна.
Лічыцца, што другая хваля пандэмічнага віруса ў цэлым мацнейшая. Таму важна ўлічваць напрацаваныя падыходы і рэкамендацыі, на ўсіх узроўнях прытрымлівацца адпрацаванай стратэгіі. "З'явіўся пэўны вопыт работы з гэтай інфекцыяй, шмат ведаў. Многія вучоныя ва ўсім свеце працуюць над гэтай праблемай. Цяпер мы ведаем аб каранавіруснай інфекцыі больш, чым калі ўсё пачалося", - адзначыў галоўны пазаштатны інфекцыяніст.
У якасці станоўчага моманту Ігар Карпаў адзначыў сумесную работу спецыялістаў розных галін. "Я нават сказаў бы - узаемадапамогу. І страціць гэта ў такі няпросты момант было б вельмі няправільна", - дадаў ён.
На гэты час ложкавы фонд перапрафілюецца. Пад пастаянным кантролем сітуацыя з забеспячэннем кіслароднымі пунктамі, апаратамі ШВЛ.
Рэкамендацыі насельніцтву застаюцца ранейшымі. Найбольш эфектыўная мера - дыстанцыраванне. "Гэта сапраўды важна. Вірус няпросты, ён існуе і ў выглядзе дысперсных часцінак, і ў выглядзе кропель, таму не здымаецца пытанне захавання яго жыццяздольнасці на паверхнях на працягу некаторага часу", - адзначыў галоўны пазаштатны інфекцыяніст. Эфектыўна праветрыванне памяшканняў. "Тыя дысперсныя часцінкі, якія ёсць у паветры, патокам паветра выдаляюцца, таму гэта рэкамендацыя на другім месцы", - сказаў загадчык кафедры.
Важнейшай мерай ён назваў нашэнне масак. Калі на адкрытым паветры гэта не так важна, то ў закрытых памяшканнях гэта пытанне адказнасці. "Не ў тым плане, што маскі на 100 працэнтаў абароняць, але яны даволі значна знізяць тую вірусную масу, якая цыркулюе ў паветры, можа выдзяляцца, ператварыцца ў дысперсныя часцінкі. Значная частка затрымліваецца маскай, гэта сапраўды важны момант", - адзначыў Ігар Карпаў. Тым больш што многія выпадкі захворвання ўзнікаюць пры кантакце з чалавекам, у якога няма клінічнай карціны. "Таму нашэнне масак вельмі важна, асабліва ў памяшканні, у нейкай меры гэта зніжае верагоднасць захворвання чалавека, які яе носіць", - дадаў ён.-0-
