8 красавіка, Мінск /Кар. БЕЛТА/. Старшыня Савета Рэспублікі Наталля Качанава і старшыня Камітэта дзяржаўнага кантролю Васіль Герасімаў правялі нараду на базе ААТ "Камволь" і азнаёміліся з вытворчасцю. Абмеркаваны праблемныя пытанні дзейнасці прадпрыемства, звязаныя з яго развіццём, рэалізацыяй гатовай прадукцыі і арганізацыяй на плошчах ААТ "Камволь" вытворчасці суконных тканін, перадае карэспандэнт БЕЛТА.
"Мы прыехалі, каб паглядзець, як рэалізуюцца даручэнні кіраўніка дзяржавы, якія ёсць праблемы ў вырашэнні гэтых пытанняў, як выконваецца бізнес-план, рэалізуецца прадукцыя і якая колькасць яе выпускаецца. Гэта была асноўная задача, пастаўленая кіраўніком дзяржавы ў ходзе яго візіту на "Камволь". Другое пытанне датычыцца прадпрыемства "Сукно". Прэзідэнт падтрымаў прапанову, што гэта вытворчасць можа размясціцца на незадзейнічаных плошчах "Камволя", - расказала Наталля Качанава.
Спікер адзначыла, што такая пільная ўвага ўдзяляецца гэтым двум прадпрыемствам невыпадкова. "Гэта тыя галіны, якія спрадвечна былі нашымі. Сёння, у прынцыпе, выпускаюцца тканіны даволі нядрэннай якасці. Але трэба бачыць перспектывы. Акрамя таго, мы павінны не зацягваючы вырашаць гэтыя пытанні. Дзяржкантроль па даручэнні Прэзідэнта кантралюе выкананне гэтага даручэння. А я як упаўнаважаны прадстаўнік кіраўніка дзяржавы ў горадзе Мінску заўсёды падключаюся да гэтых пытанняў, таму што для нас гэта вельмі важна. Гэта тое, што мы ўмеем рабіць, дзе ў нас ёсць шэраг кампетэнцый, ёсць людзі, якія ведаюць, як выпускаць добрыя тканіны і рэалізоўваць іх на рынку, - падкрэсліла яна. - Яшчэ адно даручэнне Прэзідэнта - не проста выпускаць тканіны, але і гатовую прадукцыю з іх: касцюмы, сукенкі, школьную форму. Для гэтага была пастаўлена задача адкрыць дызайнерскі цэх. Я ведаю, што ўжо адкрыта атэлье", - прадоўжыла старшыня Савета Рэспублікі.
Наталля Качанава ўпэўнена: неабходна больш рэкламаваць сваю прадукцыю, што дасць магчымасць знаходзіць новага спажыўца. Пры гэтым важна забяспечыць умовы працы і дастойную заработную плату работнікам. "Тут працуюць у асноўным жанчыны. Але важна, што шмат моладзі, - сказала яна. - Калі я прыязджала сюды і сустракалася з калектывам, людзі задавалі пытанні па інтэрнаце, будаўніцтве дзіцячых дашкольных устаноў. Я іх трымаю на кантролі. Для падбору кадраў гэта ўсё вельмі важна".
Спікер дадала, што ў прадпрыемства "Камволь" добрыя перспектывы. "Урад трымае гэта пытанне на кантролі. Са свайго боку мы таксама гатовы падставіць плячо там, дзе гэта неабходна, каб працэс ішоў хутчэй", - заявіла Наталля Качанава.
Як расказала журналістам намеснік генеральнага дырэктара па камерцыйных пытаннях ААТ "Камволь" Юлія Грынчык, па выніках 2020 года на прадпрыемстве выраблена і рэалізавана прадукцыі на Br31,5 млн. "Гэта забяспечыла прырост 13,6 працэнта да мінулага года. Нягледзячы на складаныя ўмовы на рынку, мы рэалізоўвалі прадукцыю ў больш як 15 краін. Асноўныя і традыцыйныя нашы рынкі - Расія, Украіна, Азербайджан, Узбекістан, Арменія, Казахстан. Гэтыя напрамкі актыўна развіваюцца. Асноўны прырост, вядома, адбыўся на рынку Расіі. Мы забяспечылі 25-працэнтны тэмп росту ў натуральным выражэнні. Тэндэнцыя падтрымліваецца і ў 2021 годзе. Па выніках работы за I квартал дасягнуты рост экспарту на рынак Расіі 38 працэнтаў. Наша прадукцыя рэалізуецца і на рынкі краін ЕС - Літвы, Латвіі, Сербіі, Польшчы. Мы актыўна рухаемся і па новых напрамках. Ёсць цікавасць з боку Індыі, Саудаўскай Аравіі, Пакістана, Арабскіх Эміратаў", - адзначыла яна.
Намеснік гендырэктара нагадала, што ў 2017 годзе прадпрыемства асвоіла вытворчасць тканіны ў саставе з воўнай пераважна мужчынскага асартыменту. "Гэта тканіна высокага класа для мужчынскага дзелавога касцюма. У мінулым годзе мы пачалі ўжо рухацца да вытворчасці тканіны з нізкай колькасцю воўны ў саставе, ільнозмяшчальнай тканіны, якія таксама па сваёй экалагічнасці, тактыльнасці і драпіроўцы з'яўляюцца тканінамі вельмі высокай якасці. Пры гэтым яны даступныя спажыўцу за кошт больш нізкай цаны. На гэтым наша развіццё не спынілася. Мы рухаемся далей і пачынаем вырабляць адзенне з нашых тканін. На сённяшні дзень існуюць дзве лінейкі швейных вырабаў для мужчын і жанчын. Жаночая лінейка адзення прадстаўлена пад брэндам Кamvol Collection, мужчынская - пад брэндам Lemongrass, - дапоўніла яна. - Адкрыты пілотныя гандлёвыя аб'екты. Адзін з іх дзейнічае ў гандлёвым цэнтры "Галерэя" на пр. Пераможцаў, другі ў ГЦ "Карона" на вул. Дзянісаўскай, плануецца адкрыццё ў гандлёвым цэнтры "Сталіца", "Прэзідэнт-атэлі", а таксама вельмі вялікага фірменнага магазіна на плошчах нашага прадпрыемства. Усё гэта мы плануем асвоіць у гэтым годзе і прадаставіць спажыўцу больш шырокі асартымент вырабляемай прадукцыі. Як гаворыцца, вырабляць будзем і тканіну, і адразу гатовыя вырабы".
Юлія Грынчык дадала, што прадпрыемства нацэлена задаволіць любога спажыўца як на беларускім рынку, так і ў краінах замежжа.-0-
