25 лістапада, Мінск /Кар. БЕЛТА/. Змяненні ў закон "Аб ахове здароўя" паступяць у Палату прадстаўнікоў у бліжэйшы час, не выключана, што да канца 2019 года. Аб гэтым карэспандэнту БЕЛТА паведаміла старшыня Пастаяннай камісіі Палаты прадстаўнікоў Нацыянальнага сходу Беларусі па ахове здароўя, фізічнай культуры, сямейнай і маладзёжнай палітыцы Людміла Макарына-Кібак.
Людміла Макарына-Кібак прадоўжыць работу ў Палаце прадстаўнікоў сёмага склікання. Бліжэйшыя планы звязаны з падрыхтоўкай шэрага законапраектаў. "Хутка, магчыма, да канца года, павінны паступіць папраўкі ў закон аб ахове здароўя. Чакаем паступлення законапраекта аб унясенні змяненняў у закон аб турызме", - расказала парламентарый. Яна адзначыла, што дэпутаты разам з аўтарамі законапраектаў паспелі ўжо нямала над імі папрацаваць.
Акрамя таго, у бліжэйшых планах профільнай камісіі - завяршыць падрыхтоўку да другога чытання паправак у закон аб лякарствах. Парламентарый таксама разлічвае, што сёмае скліканне будзе разглядаць і прымаць змяненні ў сямейнай маладзёжнай палітыцы.
Што датычыцца работы ў акрузе, то на першым месцы ў Людмілы Макарынай-Кібак пытанні, звязаныя з 15-й гарадской паліклінікай Мінска. У свой час пачатку будаўніцтва яе новага будынка садзейнічала і парламентарый. "Будоўля пачалася. Цяпер абмяркоўваюцца пытанні камплектацыі спецыялістамі, асабліва вузкага профілю", - растлумачыла дэпутат.
Як паведамлялася, папраўкі ў закон "Аб ахове здароўя" накіраваны на павышэнне якасці і даступнасці медыцынскай дапамогі, абарону правоў пацыентаў, у тым ліку абарону персанальных даных і інфармацыі аб стане здароўя, стварэнне сістэмы кіравання якасцю меддапамогі. Так, уводзіцца новы від медыцынскай экспертызы - якасці медыцынскай дапамогі. Акрамя таго, уносяцца змяненні, якія ўдакладняюць права пастаянна пражываючых замежных грамадзян і асоб без грамадзянства на даступнае медыцынскае абслугоўванне. Прадугледжваецца таксама ўключэнне ў дзяржаўную сістэму аховы здароўя ўніверсітэцкіх клінік. Праектам закона ўводзіцца працэдура акрэдытацыі дзяржаўных арганізацый аховы здароўя. У асобнай главе будуць урэгуляваны пытанні інфармацыйнага забеспячэння ў галіне аховы здароўя.-0-
