4 лістапада, Мінск /Кар. БЕЛТА/. Дажджы і парывісты вецер чакаюцца ў Беларусі ў выхадныя, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Да канца бягучага тыдня ў Беларусі чакаецца няўстойлівы характар надвор'я. Франтальныя раздзелы будуць прыносіць усё новыя і новыя порцыі ападкаў, тэмпературны фон пачне паступова паніжацца, не дабавіць камфорту і моцны парывісты вецер", - расказалі ў Белгідрамеце.
У пятніцу, 5 лістапада, умовы надвор'я ў Беларусі ў асноўным будуць вызначаць атмасферныя франты ад цыклону, цэнтр якога будзе перамяшчацца з поўначы Польшчы на Фінскі заліў. Ноччу на большай частцы тэрыторыі, днём месцамі па краіне пройдуць кароткачасовыя дажджы. Ноччу і раніцай у асобных раёнах чакаецца туман. Вецер прагназуецца паўднёвы з пераходам на заходні парывісты, днём у многіх раёнах моцны парывісты. Тэмпература паветра ноччу складзе 5-11 градусаў вышэй за нуль, днём - ад плюс 8 па паўночным захадзе да 15 градусаў цяпла па паўднёвым усходзе краіны.
У суботу і нядзелю, 6-7 лістапада, надвор'е будуць вызначаць франтальныя раздзелы і няўстойлівая паветраная маса, якая паступае з поўдня Балтыйскага мора. У суботу ноччу месцамі, днём на большай частцы тэрыторыі краіны пройдуць дажджы. У асобных раёнах магчымы слабы туман. Вецер прагназуецца паўднёва-заходні парывісты, месцамі моцны парывісты. Тэмпература паветра ноччу складзе 1-7 градусаў вышэй за нуль, днём - 5-12 градусаў цяпла.
У нядзелю, 7 лістапада, на большай частцы тэрыторыі краіны пройдуць дажджы. У асобных раёнах магчымы слабы туман. Вецер прагназуецца паўднёва-заходні парывісты, месцамі моцны парывісты. Тэмпература паветра ноччу складзе 2-7 градусаў вышэй за нуль, днём - 5-12 градусаў цяпла.
У панядзелак, 8 лістапада, краіна будзе пад уплывам атмасферных франтоў ад цыклону, які перамяшчаецца з поўдня Скандынавіі на паўночна-заходнія раёны еўрапейскай часткі Расіі, за якімі ў далейшым у Беларусь пачне паступаць халодная няўстойлівая паветраная маса. Тэмпературны фон панізіцца, а гэта значыць, што ёсць магчымасць выпадзення дажджу з мокрым снегам. Тэмпература паветра ноччу складзе 2-7 градусаў вышэй за нуль, днём - 4-10 градусаў цяпла.
У аўторак, 9 лістапада, месцамі па краіне пройдуць кароткачасовыя ападкі (дождж, мокры снег). Тэмпература паветра ноччу складзе ад мінус 2 да плюс 4, днём - 2-8 градусаў цяпла.-0-