13 красавіка, Уладзівасток /Кар. БЕЛТА/. Прэзідэнт Беларусі Аляксандр Лукашэнка адзначыў, што, знаходзячыся ва Уладзівастоку, рады магчымасці пабываць на востраве Рускім, рашэнне аб развіцці якога ў свой час прымалася асабіста расійскім лідарам. Аб гэтым кіраўнік дзяржавы расказаў сёння на сустрэчы з губернатарам Прыморскага края Алегам Кажамякам, перадае карэспандэнт БЕЛТА.
"Гэта перш за ўсё заслуга Уладзіміра Уладзіміравіча, што мне на новым вітку нашага развіцця выпала пабываць на краі нашай агульнай Айчыны, - адзначыў Аляксандр Лукашэнка. - Прэзідэнт Расіі мне шмат разоў гаварыў, каб я абавязкова пабываў ва Уладзівастоку на востраве Рускім. Я гавару: добра, з'езджу, пагляджу. Усё ж такі гэта ад яго залежала. Я ведаю, як прымалася рашэнне. Было няпроста. Ад яго залежала, ці будзе добраўпарадкаваны гэты востраў, будзе ён такім знакавым ці не. Учора якраз гэты момант абмяркоўвалі".
Кіраўнік дзяржавы коратка пераказаў гісторыю таго, як прымалася лёсавызначальнае рашэнне адносна вострава: "Усё, прынялі рашэнне - нічога не будзем рабіць. Грошы вялікія. Гаворыць (Уладзімір Пуцін. - Заўвага БЕЛТА), раніцай прыйшоў, сеў, падумаў: "Не, трэба пабудаваць. Таму што потым не пабудуем". Ён мне ўчора (на сустрэчы ў Амурскай вобласці 12 красавіка. - Заўвага БЕЛТА) расказваў гэту гісторыю ў дэталях".
"Усё ж такі я так разумею, што ў Расіі ёсць знакавыя аб'екты пуцінскага перыяду. Я іх называю помнікамі, якія ўзводзіць кіраўнік дзяржавы. Усе мы нешта маем такое, што стварылі ў час сваёй працы. І вось ён ганарыцца востравам Рускім, яшчэ мне называў некалькі аб'ектаў. А ўчора паказаў у Амурскай вобласці чарговы ўнікальны праект (размова пра касмадром Усходні і інфраструктуру вакол яго. - Заўвага БЕЛТА), якім будзе не толькі ганарыцца Расія. Гэта сусветнага ўзроўню. І самі тэхналогіі аналагаў не маюць у свеце наогул", - сказаў Аляксандр Лукашэнка.
Рускі - востраў у заліве Пятра Вялікага ў Японскім моры. Размешчаны за кіламетр ад Уладзівастока і з'яўляецца часткай муніцыпальнага ўтварэння Уладзівастоцкая гарадская акруга. Уваходзіць у архіпелаг імператрыцы Яўгеніі. Тэрыторыя вострава - 97,6 кв.км, даўжыня - 18 км, шырыня - 13 км. Ад паўвострава Мураўёва-Амурскага, дзе размешчана асноўная частка Уладзівастока, Рускі аддзелены пралівам Басфор Усходні.
Доўгі час востраў меў статус закрытай тэрыторыі, дзе размяшчаліся практычна разбураныя да цяперашняга часу ўмацаванні Уладзівастоцкай крэпасці і мноства воінскіх часцей.
У часы СССР тут знаходзілася некалькі ваенных гарадкоў. Рускі быў вялікай вучэбнай базай усяго ваенна-марскога флоту краіны, дзе размяшчаўся шэраг вучэбных часцей, уключаючы радыётэхнічную школу, а таксама школы механікаў, мічманаў, сувязі, зброі. На беразе бухты Астраўной размяшчалася часць спецыяльнага прызначэння ВМФ - 42-і марскі разведвальны пункт спецыяльнага прызначэння.
Пасля распаду СССР на востраве быў створаны аздараўленчы комплекс "Белы лебедзь". У 2002 годзе заснаваны Свята-Серафімаўскі мужчынскі манастыр.
Летам 2012 года пабудаваны Рускі мост, які злучае востраў з мацерыковай часткай Уладзівастока. Збудаванне ўзначаліла спіс самых доўгіх вантавых мастоў у свеце. Яго адкрыццё дало магчымасць аўтаўладальнікам скараціць час на шляху з цэнтра Уладзівастока да вострава з трох гадзін да 20 хвілін.
На Рускім размешчаны Далёкаўсходні федэральны ўніверсітэт. Да саміту АТЭС у 2012 годзе ў бухце Аякс быў пабудаваны кампус універсітэта (вучэбны працэс пачаўся 1 верасня 2013 года).
На тэрыторыі вострава створана турысцка-рэкрэацыйная асаблівая эканамічная зона. У верасні 2016 года на паўвостраве Жыткова адкрыты Прыморскі акіянарыум (навукова-адукацыйны комплекс Далёкаўсходняга аддзеляння РАН). Запланавана будаўніцтва Ваенна-патрыятычнага парку культуры і адпачынку Усходняй ваеннай акругі "Патрыёт".
У 2018 годзе Савет Федэрацыі адобрыў закон аб стварэнні на востраве Рускім спецыяльнага адміністрацыйнага раёна (САР) - афшорнай тэрыторыі з асаблівымі фінансавымі і адміністрацыйнымі ўмовамі.-0-
