Сцяг Аўторак, 19 сакавіка 2024
Усе навіны
Усе навіны
Прэзідэнт
12 красавіка 2022, 11:31

Лукашэнка і Пуцін наведваюць касмадром Усходні ў Амурскай вобласці

12 красавіка, Амурская вобласць /Кар. БЕЛТА/. Прэзідэнты Беларусі і Расіі Аляксандр Лукашэнка і Уладзімір Пуцін прыбылі на верталёце на касмадром Усходні ў Амурскай вобласці Расійскай Федэрацыі, перадае карэспандэнт БЕЛТА.

Кіраўнікі дзяржаў азнаёмяцца з ходам будаўніцтва стартавага касмічнага комплексу, паразмаўляюць з лётчыкамі-касманаўтамі і супрацоўнікамі касмадрома. Наведванне касмадрома прымеркавана да Дня касманаўтыкі, які адзначаецца 12 красавіка.

На касмадроме прэзідэнты ў фармаце сам-насам абмяркуюць актуальныя пытанні ў развіцці двухбаковых адносін, сумесныя меры па процідзеянні санкцыйнаму націску з боку калектыўнага Захаду, абстаноўку ў рэгіёне і свеце, падзеі ва Украіне.

Як паведамлялася БЕЛТА, Беларусь і Расія ў сферы касмічнага супрацоўніцтва вядуць работу над стварэннем расійска-беларускага касмічнага апарата дыстанцыйнага зандзіравання Зямлі звышвысокага распазнавання і расійска-беларускай касмічнай сістэмы на яго аснове.

Рэалізуецца таксама праект па падрыхтоўцы да касмічнага палёту беларускіх грамадзян, у тым ліку для сумеснай работы на МКС. Адбор кандыдатаў для падрыхтоўкі да касмічнага палёту і фарміраванне прапаноў у навуковую праграму палёту беларускім бокам павінна быць завершана да 15 чэрвеня бягучага года. Затым пройдзе ўжо канчатковы адбор з ліку кандыдатаў.

Касмадром Усходні - першы грамадзянскі касмадром у Расіі. Размешчаны ў Амурскай вобласці паблізу горада Цыялкоўскі. Касмадром будуецца для забеспячэння незалежнага доступу ў космас, гарантаванага выканання міжнародных і камерцыйных касмічных праграм, скарачэння затрат для выкарыстання размешчанага ў Казахстане касмадрома Байканур і паляпшэння сацыяльна-эканамічнай абстаноўкі ў Амурскай вобласці.

У рамках першай чаргі будаўніцтва касмадрома ў 2012-2016 гадах узведзены ўніверсальны стартавы комплекс для ракет-носьбітаў серыі "Саюз-2". Другая чарга будаўніцтва ўключае ўзвядзенне стартавага стала пад ракеты-носьбіты "Ангара-А5" і спадарожнай інфраструктуры. Плануецца, што гэтыя работы завершацца да канца 2022 года.

У 2019 годзе дзяржаўная карпарацыя па касмічнай дзейнасці "Раскосмас" прапанавала Беларусі разгледзець магчымасць удзелу беларускіх будаўнічых кампаній у будаўніцтве аб'ектаў касмадрома Усходні ў Амурскай вобласці. На працягу 2020-2022 гадоў з расійскім бокам на розных узроўнях прапрацоўвалася пытанне стварэння прававой асновы для ўдзелу беларускіх будаўнічых арганізацый і спецыялістаў у будаўніцтве аб'ектаў касмадрома.

Па выніках прапрацоўкі прапановы з зацікаўленымі федэральнымі органамі 5 красавіка 2022 года Прэзідэнт Расіі ўнёс у Дзяржаўную думу законапраект, згодна з якім дзяржкарпарацыя "Раскосмас" і яе арганізацыі надзяляюцца правам прыцягваць беларускіх грамадзян і беларускія кампаніі для ажыццяўлення дзейнасці на тэрыторыі закрытага адміністрацыйна-тэрытарыяльнага ўтварэння Цыялкоўскі, у тым ліку для выканання работ і аказання паслуг, звязаных з будаўніцтвам і рэканструкцыяй аб'ектаў наземнай касмічнай інфраструктуры касмадрома Усходні. Законапраект 6 красавіка быў прыняты ў першым чытанні і накіраваны на зацвярджэнне ў Савет Федэрацыі.-0-

Падпісвайцеся на нас у
Twitter
Топ-навіны
Свежыя навіны Беларусі