28 снежня, Мінск /Кар. БЕЛТА/. Час сёння патрабуе ад кожнага з беларусаў думаць не толькі аб сабе, але і аб краіне. Аб гэтым Прэзідэнт Беларусі Аляксандр Лукашэнка заявіў на Навагоднім балі для моладзі ў Палацы Незалежнасці, перадае карэспандэнт БЕЛТА.
"Дарагія сябры! Сёння Палац Незалежнасці належыць вам. Не раз гаварыў і паўтару, што ён адкрыты для ўсіх, хто імкнецца сумленна служыць сваёй Айчыне і свайму народу", - звярнуўся Аляксандр Лукашэнка да ўдзельнікаў балю.
Кіраўнік дзяржавы падкрэсліў, што тут ствараецца гісторыя сучаснай Беларусі, прымаюцца стратэгічна важныя рашэнні. "У абмеркаванні іх удзельнічаюць людзі, якія не баяцца браць на сябе адказнасць за лёс краіны. І наша сённяшняе свята - гэта таксама старонка гісторыі. Але гісторыі нашай Радзімы", - адзначыў Прэзідэнт.
Аляксандр Лукашэнка адзначыў, што ў зале прысутнічаюць курсанты - будучыя афіцэры, якія ўжо могуць і самі расказаць пра абавязак Айчыне, пра патрыятызм. "Гэта ў іх у крыві, калі выбралі такую высакародную прафесію - Радзіму абараняць. І час сёння патрабуе ад кожнага з нас думаць не толькі аб сабе, але і аб краіне, як пафасна часам гэта ні гучала б. Незалежна ад таго, носім мы пагоны або не, працуем у дзяржустанове або пішам карціны", - дадаў беларускі лідар.-0-
