27 сакавіка, Мінск /Аліна Грышкевіч - БЕЛТА/. Трэцяе пасяджэнне беларуска-аманскага савета дзелавога супрацоўніцтва адбудзецца ў красавіку ў Мінску. Пытанні падрыхтоўкі да гэтага пасяджэння разглядаліся ў час паездкі Надзвычайнага і Паўнамоцнага Пасла Беларусі ў Егіпце Сяргея Рачкова ў Султанат Аман, дзе ён акрэдытаваны па сумяшчальніцтве, паведамілі карэспандэнту БЕЛТА ў прэс-службе МЗС.
На сустрэчы з дырэктарам дэпартамента Усходняй Еўропы МЗС Амана шэйхам Ахмедам аль-Гінаем абмеркаваны актуальныя пытанні беларуска-аманскіх адносін, уключаючы правядзенне чарговага раўнда двухбаковых палітычных кансультацый і заключэнне шэрага пагадненняў аб супрацоўніцтве ў сферах, маючых узаемны інтарэс.
У цэнтры ўвагі ў час сустрэчы з намеснікам міністра прамысловасці і гандлю Ахмадам бен Хасанам аль-Зібам знаходзілася праблематыка павелічэння двухбаковага тавараабароту і развіцця інвестыцыйнага супрацоўніцтва. На перагаворах са старшынёй Аманскай гандлёва-прамысловай палаты Кайсам аль-Юсефам разгледжаны шляхі пашырэння гандлёва-эканамічных сувязей паміж Беларуссю і Аманам, а таксама ход падрыхтоўкі трэцяга пасяджэння беларуска-аманскага савета дзелавога супрацоўніцтва ў красавіку ў Мінску.
Тэма правядзення ў лістападзе Дзён культуры Беларусі ў Амане абмеркавана з саветнікам міністра культуры Аманам Фэйсалам бен Хамудам аль-Бусаідзі. Тэматыка ўзаемадзеяння музеяў дзвюх краін, уключаючы пытанні падрыхтоўкі аманскай выставы ў Нацыянальным мастацкім музеі Беларусі, была закранута на сустрэчы з дырэктарам Нацыянальнага музея Амана Джамалем аль-Мусаві.
У час паездкі пасол Беларусі таксама правёў шэраг сустрэч з прадстаўнікамі аманскіх дзелавых колаў.-0-
