26 снежня, Мінск /Кар. БЕЛТА/. Кампанія па дэклараванні фізічнымі асобамі даходаў за 2022 год стартуе ў Беларусі з 1 студзеня 2023 года, паведамілі БЕЛТА ў Міністэрстве па падатках і зборах.
Прадставіць падатковую дэкларацыю (разлік) па падаходным падатку аб даходах, атрыманых у 2022 годзе, фізічным асобам неабходна не пазней за 31 сакавіка 2023 года. Зрабіць гэта можна шляхам асабістага наведвання падатковага органа, праз свайго законнага або ўпаўнаважанага прадстаўніка, накіраваць па пошце або перадаць з дапамогай праграмных і тэхнічных сродкаў праз асабісты кабінет плацельшчыка.
Паведаміць аб даходах неабходна, калі ў 2022 годзе фізічная асоба, напрыклад, прадала другую кватэру на працягу пяці гадоў, другі легкавы аўтамабіль на працягу каляндарнага года, атрымала падарункі не ад блізкіх сваякоў у суме, якая перавышае Br8078, або атрымлівала даходы ад крыніц за межамі Беларусі.
Заплаціць падаходны падатак, вылічаны на падставе прадстаўленай падатковай дэкларацыі, неабходна не пазней за 1 чэрвеня 2023 года.-0-
