31 снежня, Мінск /Кар. БЕЛТА/. Міністэрства антыманапольнага рэгулявання і гандлю Беларусі ўстанавіла пералік алкагольных напіткаў на 2022 год, на імпарт якіх не распаўсюджваецца выключнае права дзяржавы. Адпаведная пастанова МАРГ ад 27 снежня 2021 года нумар 82 апублікавана сёння на Нацыянальным прававым інтэрнэт-партале, паведамляе БЕЛТА.
У спіс увайшло 22 найменні французскага шампанскага (у тым ліку Moet & Chandon, Veuve Clicquot Ponsardin Brut, Dom Perignon, Louis Roederer Cristal, GHMumm, Perrier-Jouet, Bollinger), 52 найменні каньякоў, у тым ліку вырабленых з каньячных спіртоў, вытрыманых больш за 10 гадоў (Hennessy, Martell, Remy Martin, Camus, Erebuni, Armenia, Legenda Moldovei і інш.), 85 найменняў віскі (Grant's, Aberlour, Ballantine's, Jameson, Jim Beam і інш.), 26 найменняў рому (Bacari Club, Varadero, Angostura і інш), 3 найменні джыну. Акрамя таго, у пераліку і вінаградныя віны з мінімальнай цаной вытворцы 10 еўра за ёмістасць 0,75 л на ўмовах FCA.
Пастанова ўступае ў сілу з 1 студзеня 2022 года.-0-
