15 жніўня, Мінск /Кар. БЕЛТА/. Устойлівая работа эканомікі дае магчымасць нівеліраваць уплыў санкцый на насельніцтва. Аб гэтым заявіў намеснік міністра эканомікі Дзмітрый Ярашэвіч, каменціруючы даручэнні, якія былі дадзены на пасяджэнні Савета Міністраў пад старшынствам кіраўніка дзяржавы, паведамілі БЕЛТА ў прэс-службе Мінэканомікі.
Як падкрэсліў Дзмітрый Ярашэвіч, работу эканомікі трэба ацэньваць сістэмна, цераз прызму розных макрапаказчыкаў. "Для нашай краіны асаблівае значэнне традыцыйна мае знешні гандаль. Па выніках паўгоддзя знешнегандлёвае сальда па таварах і паслугах склала плюс $2,3 млрд. Гэта вельмі сур'ёзны рэзультат. Акрамя таго, калі разглядаць сітуацыю ў дынаміцы, месяц да месяца, то экспарт тавараў аднаўляецца. Калі ў красавіку 2022 года і красавіку 2021 года ён складаў 77 працэнтаў, то ў маі - 90 працэнтаў, а ўжо ў чэрвені - 99,6 працэнта. Іншымі словамі, аб'ёмы паставак практычна вярнуліся да мінулагодніх значэнняў", - звярнуў увагу ён.
"Нашу прадукцыю гатовы купляць на перспектыўных рынках далёкай дугі. Таму, калі будуць канчаткова вырашаны лагістычныя пытанні, мы таксама чакаем павелічэння экспарту. Хуткарослыя Афрыка, Азія - гэта якраз тыя пункты росту сусветнай эканомікі, якія ў бліжэйшы час праглядаюцца", - адзначыў намеснік міністра.
Гаворачы аб унутраных драйверах росту, Дзмітрый Ярашэвіч асабліва адзначыў значэнне спажывання. "Мы хочам, каб пакупная здольнасць насельніцтва расла не толькі па прадуктах харчавання, але і па нерухомай маёмасці, іншых пазіцыях. Плануецца прапрацаваць дадатковыя стымулюючыя інструменты і механізмы да ўжо дзеючых. Чым больш мы спажываем, тым эканоміцы лепш. Тут ключавое значэнне адыгрывае ўзровень даходаў. У краіне расце заработная плата, крыху павольней, чым інфляцыя. Гэта 99,6 працэнта. І тое мы можам выправіць сітуацыю ў рэальным выражэнні па выніках года. З 1 жніўня сур'ёзна павялічаны пенсіі: рост практычна на 25 працэнтаў да жніўня мінулага года. Інакш кажучы, тыя прыярытэты, якія абазначыў кіраўнік дзяржавы, каб людзі не адчулі ўплыву санкцый, выконваюцца", - рэзюмаваў намеснік міністра.-0-
