2 жніўня, Мінск /Кар. БЕЛТА/. Экспарт беларускіх будматэрыялаў у першым паўгоддзі вырас амаль на 20 працэнтаў. Аб гэтым сказаў сёння на прэс-канферэнцыі "Вынікі работы архітэктурна-будаўнічай галіны за першае паўгоддзе 2021 года і перспектывы развіцця будкомплексу Беларусі" міністр архітэктуры і будаўніцтва Руслан Пархамовіч, перадае карэспандэнт БЕЛТА.
"Дынаміка па экспарце будаўнічых матэрыялаў дадатная і складае каля 120 працэнтаў па выніках работы за першае паўгоддзе 2021 года. Традыцыйна склалася, што ад 40 працэнтаў да 95 працэнтаў (у залежнасці ад экспартаарыентаванасці прадпрыемства) прадукцыі, якая вырабляецца, ідзе на экспарт. Ёсць пазіцыі, якія прырастаюць цяпер. Мы бачым, што павялічваюцца пастаўкі цэменту, шчэбню. Значна ўзрос экспарт шкла, керамічнай пліткі, шклаваты", - сказаў Руслан Пархамовіч.
Што датычыцца рынкаў збыту, ён адзначыў: "Калі пэўны час таму мы гаварылі аб тым, што ў пераважнай большасці ўсе будаўнічыя матэрыялы пастаўляліся ў Расію - каля 90 працэнтаў ад усяго экспарту тавараў было сканцэнтравана менавіта на гэтым рынку, то сёння мы можам гаварыць аб працэнтных суадносінах 60 і 40. Гэта значыць цяпер не больш за 60 працэнтаў складае рынак Расійскай Федэрацыі, усё астатняе - гэта зрушэнне прыярытэтаў па перыметры нашай краіны. Каля 15 працэнтаў ад усяго аб'ёму пастаўляемай прадукцыі прыпадае на Польшчу, каля 15 працэнтаў - на Украіну, крыху менш - на Літву і Латвію. Таксама мы працуем і на больш далёкія адлегласці - гэта Казахстан, Азербайджан. Мы будзем прадаўжаць дыверсіфікаваць экспарт, адыходзіць ад традыцыйнага рынку для таго, каб у выпадку якіх-небудзь змяненняў можна было даволі проста, аператыўна адрэагаваць і зрушыць нашы прыярытэты на іншыя напрамкі".
Паводле слоў міністра, адным з найбольш перспектыўных для Мінбудархітэктуры бачыцца рынак Венгрыі. "Сёння там даволі актыўна вядзецца будаўніцтва розных аб'ектаў прамысловага прызначэння, аўтаканцэрнаў, пачата работа і па атамнай станцыі. Мы плануем прыцягнуць у гэту краіну і беларускіх будаўнікоў, айчынныя будматэрыялы. Не так даўно ў гэтым ключы прайшлі перагаворы з расійскім паслом, які знаходзіцца цяпер у Венгрыі", - расказаў ён.
Таксама Руслан Пархамовіч закрануў тэму арэнднага жылля. "Мы бачым, што сёння штогод у цэлым па краіне ўводзіцца каля 130 тыс. кв.м арэнднага жылля. На мой погляд, гэта крытычна малы рэзультат, неабходна ў разы павялічваць аб'ёмы будаўніцтва такога віду жылля", - падкрэсліў ён.
Кіраўнік міністэрства адзначыў, што ўрадам створана рабочая група, якая да канца лета павінна ўнесці прапановы па развіцці будаўніцтва арэнднага жылля ў краіне ў цэлым. "Мы маем намер крыху падкарэкціраваць канцэпцыю. Больш уважліва разглядаем практыку, якой карыстаюцца ў краінах-суседзях. Напрыклад, у адносінах да такога паняцця, як даходны дом, арэндны дом, для таго, каб гэта стала цікава і камерцыйным забудоўшчыкам, а не толькі для таго, каб будаваць дзяржаўнае арэнднае жыллё", - дадаў ён. Таксама да будаўніцтва арэнднага жылля неабходна прыцягваць і прадпрыемствы.-0-
