7 мая, Мінск /Кар. БЕЛТА/. Спад у глабальнай эканоміцы, абумоўлены пандэміяй каранавіруса, прывядзе да абвастрэння супрацьборства паміж вялікімі сусветнымі дзяржавамі. Такое меркаванне выказаў галоўны навуковы супрацоўнік Кітайскага цэнтра міжнародных эканамічных абменаў, генсакратар Акадэмічнага камітэта Нацыянальнай камісіі КНР па развіцці і рэформах Чжан Яньшэн на анлайн-канферэнцыі "Эканамічныя наступствы каранавіруса: ініцыятыва "Пояс і шлях" у новых сусветных умовах", арганізаванай міжнародным дыскусійным клубам "Валдай", паведамляе ТАСС.
Эксперт звярнуў увагу на тое, што згодна з прагнозамі МВФ глабальная эканоміка да канца гэтага года знізіцца на 3 працэнты, а ў наступным годзе, калі і прадэманструе рост, то нязначны. "Цяпер мы вельмі апасаемся, што адбудзецца другая хваля пандэміі. Магчыма, у Еўропе і Амерыцы. Тады сусветная эканоміка яшчэ больш адкоціцца назад. У многіх краін вырасце даўгавая нагрузка, а глабальная фінансавая сістэма сутыкнецца з вялікімі цяжкасцямі", - сказаў аналітык.
"Сусвет можа панесці не толькі эканамічныя страты. Існуе пагроза сур'ёзнага процістаяння паміж вялікімі дзяржавамі. Кітайцы больш за ўсё апасаюцца, што можа паўтарыцца сітуацыя, калі ў мінулым стагоддзі пасля эканамічнай рэцэсіі 20-30-х гадоў узнікла гарачая вайна", - падкрэсліў ён.
Каб максімальна згладзіць эканамічныя наступствы пандэміі, трэба, на думку спецыяліста, у першую чаргу ўдзяліць увагу такім пытанням, як забеспячэнне занятасці і падтрыманне ўзроўню зарплат насельніцтва, захаванне таварных, сыравінных і энергетычных ланцугоў, а таксама падтрымка малога і сярэдняга бізнесу.
У сваю чаргу старшы навуковы супрацоўнік Акадэміі даследаванняў сучаснага Кітая і сусвету Ван Ган'і адзначыў, што да другой хвалі пандэміі неабходна пачаць рыхтавацца загадзя. "Мы як краіны-суседзі, удзельнікі ініцыятывы "Пояс і шлях" павінны абменьвацца вопытам барацьбы з захворваннем, рэзультатамі медыцынскіх даследаванняў, - лічыць эксперт. - Рыхтуючыся да наступных хваль пандэміі, нам трэба выпрацаваць механізмы міжнароднага супрацоўніцтва".
Успышка захворвання, выкліканага каранавірусам, была зафіксавана ў канцы снежня 2019 года ў Цэнтральным Кітаі. Сусветная арганізацыя аховы здароўя 11 сакавіка прызнала яе пандэміяй. Паводле апошніх даных, каранавірусам у свеце заразілася больш за 3,6 млн чалавек, каля 260 тыс. памерлі.-0-
