1 верасня, Мінск /Кар. БЕЛТА/. Выстава "Я на плыце сваіх гадоў...", прысвечаная 80-годдзю беларускага пісьменніка, паэта, публіцыста, мастака Мікалая Бусько, адкрылася сёння ў Нацыянальнай бібліятэцы Беларусі. Аб гэтым БЕЛТА паведамілі ў НББ.
У экспазіцыі прадстаўлены кнігі паэзіі Мікалая Бусько "У Немна на плячах", "Сузор'е шаляў", зборнік апавяданняў, аповесцей, нарысаў "Сляды ад верасня". Наведвальнікі змогуць азнаёміцца з кнігамі для дзяцей "Ад галінкі да сучка - тэлефон у павучка", "Бабрыная навука", "У бары жывуць сябры", "Лясныя дзівосы". Акрамя таго, можна ўбачыць тэматычныя зборнікі і перыядычныя выданні з творамі пісьменніка, літаратуру з біяграфічнай інфармацыяй пра юбіляра, а таксама аформленую Мікалаем Бусько кнігу "Паэзія баразны" беларускага паэта Алеся Мілюця.
"Мікалай Бусько - прыхільнік традыцыйна-класічнай манеры пісьма. Яго паэзіі ўласціва шчырасць, вобразнасць, у вершах адлюстраваны карціны прыроды, рэаліі малой радзімы; героі празаічных твораў - простыя людзі, надзеленыя пачуццём абавязку і справядлівасці", - адзначылі ў НББ.
Выстава будзе працаваць па 11 лістапада.-0-