6 сакавіка, Мінск /Кар. БЕЛТА/. Святочны канцэрт "Прызнанне ў каханні" адбудзецца 8 сакавіка на сцэне канцэртнай залы "Верхні горад", паведамілі БЕЛТА арганізатары.
"Канцэртная зала "Верхні горад" запрашае ўсіх на сустрэчу з высокім мастацтвам. Толькі музыка, толькі магія вакалу, толькі любоў. У гэты святочны вечар прагучыць любоўная лірыка: папулярныя арыі, рамантычныя дуэты, чароўныя рамансы і вядомыя песні, прысвечаныя прыгожай палове чалавецтва", - расказалі арганізатары.
Ствараць атмасферу музычнага вечара будуць зоркі опернай сцэны - артысты, чые імёны ўжо даўно палюбіліся айчыннаму і замежнаму тэатральнаму гледачу: народны артыст Беларусі Васіль Кавальчук (бас), заслужаны артыст Беларусі Уладзімір Громаў (барытон), лаўрэаты міжнародных конкурсаў Алена Золава (сапрана) і Аляксандр Міхнюк (тэнар). Партыю фартэпіяна выканае ўладальніца медаля Францыска Скарыны Юлія Шчарбакова.-0-
