23 лютага, Мінск /Кар. БЕЛТА/. Фотадакументальная экспазіцыя "Армія, народжаная Кастрычнікам", прысвечаная Дню абаронцаў Айчыны і Узброеных Сіл, адкрылася сёння ў Беларускім дзяржаўным музеі гісторыі Вялікай Айчыннай вайны, перадае карэспандэнт БЕЛТА.
Чырвоная армія, створаная ў 1918 годзе, была выпрабавана Грамадзянскай, Савецка-фінляндскай, Другой сусветнай войнамі і мноствам лакальных ваенных канфліктаў. Яна перажыла розныя рэарганізацыі. Фотадакументальныя матэрыялы з фондаў музея раскрываюць асноўныя этапы яе гісторыі, звязаныя з Беларуссю і яе ўраджэнцамі.
"Сёння свята сапраўдных мужчын. Я ганаруся нашымі слаўнымі Узброенымі Сіламі, воінамі, якія ў складанейшых умовах, на палігонах адточваюць сваё майстэрства. І не было б цяпер такой арміі, калі б не было гісторыі яе зараджэння. Станаўленне Чырвонай арміі, бітва пад Псковам і Нарвай, баі ў раёне возера Хасан і ракі Халхін-Гол, Вялікая Айчынная вайна, выкананне інтэрнацыянальнага абавязку ў Афганістане - усё гэта звязана з тэмай салдата, афіцэра, абаронца Айчыны. І задача музея расказаць, з чаго ўсё пачыналася і якія выпрабаванні пройдзены", - сказаў дырэктар музея Уладзімір Варапаеў.
Паводле слоў загадчыцы аддзела ваенна-франтавой гісторыі Святланы Прыбыш, матэрыялы выстаўкі прысвечаны вядомым ваеначальнікам, чый баявы шлях пачынаўся ў гады Першай сусветнай, Грамадзянскай і Савецка-фінляндскай войнаў і прадаўжаўся ў гады галоўных выпрабаванняў Вялікай Айчыннай вайной. Гэта беларускія генералы Аляксандр Пулка-Дзмітрыеў, Рыгор Пласкоў, Валянцін Пянькоўскі, Іван Якубоўскі. "Напрыклад, генерал-лейтэнант Іван Касабуцкі быў удзельнікам Першай сусветнай вайны, ваяваў у 17-й Горкаўскай стралковай і 8-й Мінскай стралковай дывізіях і ў далейшым удзельнічаў у бітве за Днепр, вызваленні Украіны, Румыніі і Балгарыі", - адзначыла яна.
Фотаздымкі, газеты, лістоўкі, плакаты і карты дадуць магчымасць наведвальнікам прайсці баявы шлях Заходняга (3-га Беларускага) фронту ў гады Вялікай Айчыннай вайны. Прадстаўлена таксама падборка з партызанскіх рукапісных часопісаў, якая не толькі раскажа аб тым, што і ў партызанскіх атрадах быў вельмі памятным дзень 23 лютага, але і ў цэлым нагадае яшчэ раз аб гераічнай барацьбе, якую вялі беларускія партызаны.
Заключны раздзел экспазіцыі ілюструе пасляваенны перыяд, калі воіны Чырванасцяжнай Беларускай ваеннай акругі, прадаўжаючы баявыя традыцыі дзядоў і бацькаў, удасканальвалі сваё майстэрства, удзельнічалі ў розных вучэннях.
Наведаць выставачны праект можна па 21 сакавіка.-0-
