13 студзеня, Мінск /Кар. БЕЛТА/. Выстава карцін "Край ты мой любімы" да 80-годдзя з дня нараджэння Уладзіміра Мулявіна адкрылася сёння ў Нацыянальным цэнтры сучасных мастацтваў. Аб гэтым БЕЛТА паведамілі арганізатары.
"На выставе прадстаўлены карціны, якія, на маю думку, адлюстроўваюць тэматыку песень легендарнай групы "Песняры". Экспанаты расказваюць наведвальнікам пра ідэальныя узаемаадносіны паміж чалавекам і светам, неперадавальнае хараство беларускай прыроды. Гэта настальгія па мінулым - даніна памяці беларускаму песняру", - адзначыў куратар выставы Міхал Мірашнікоў.
Гэты ансамбль з'яўляецца прызнаным лідарам фолк-рока як на тэрыторыі нашай краіны, так і ўсяго былога СССР. Яны сталі любімай групай знатакоў музыкі і людзей, чыё дзяцінства і юнацтва прыпалі на 1980-1990-я гады. Наведаць выставачны праект можна па 24 студзеня.
Уладзімір Мулявін - беларускі музыкант, эстрадны спявак, гітарыст, кампазітар, аранжыроўшчык, мастацкі кіраўнік вакальна-інструментальнага ансамбля "Песняры", народны артыст Беларусі і СССР. Нарадзіўся 12 студзеня 1941 гады ў Свярдлоўску. Яшчэ ў дзяцінстве пачаў захапляцца музыкай. Пасля школы паступіў у Свярдлоўскае музычнае вучылішча. Працаваў музыкантам у розных абласных філармоніях Урала і Сібіры. У 1963 годзе пачаў сваю дзейнасць у Беларускай дзяржаўнай філармоніі, дзе ў 1968 годзе стварыў вакальна-інструментальны ансамбль "Лявоны", які пазней перайменаваў у "Песняры". Народныя песні ў апрацоўцы музыканта, кампазіцыі на вершы класікаў беларускай літаратуры ў выкананні ансамбля сталі папулярнымі далёка за межамі СССР. За значны ўклад у развіццё беларускага эстраднага мастацтва ў 2001 годзе Уладзімір Мулявін быў узнагароджаны ордэнам Францыска Скарыны. Легенды беларускай музыкі не стала 26 студзеня 2003 года.-0-
