8 лістапада, Мінск /Кар. БЕЛТА/. Кітай і ЗША падпісалі камерцыйныя пагадненні на агульную суму $9 млрд у час першага дня дзяржаўнага візіту прэзідэнта ЗША Дональда Трампа ў КНР, паведамляе ТАСС са спасылкай на Цэнтральнае тэлебачанне Кітая.
Было заключана 19 пагадненняў у сферы авіяцыі, біянавукі, высокатэхналагічнай вытворчасці і іншых галінах. Цырымонія падпісання прайшла ў Доме народных сходаў у цэнтры Пекіна ў прысутнасці віцэ-прэм'ера КНР Ван Яна і міністра гандлю ЗША Уілбура Роса. Адной са здзелак стала пагадненне аб закупцы кітайскім гігантам інтэрнэт-гандлю JD.com амерыканскіх харчовых тавараў на $2 млрд.
Амерыканскага лідара Дональда Трампа, які прыбыў з дзяржаўным візітам у Кітай, суправаджаюць прадстаўнікі 30 буйных карпарацый.
Цэнтральнае тэлебачанне Кітая таксама паведамляе, што прэзідэнт ЗША і яго жонка Меланья Трамп адразу пасля свайго прылёту ў Пекін адправіліся разам са старшынёй КНР Сі Цзіньпінам і Пэн Ліюань на прагулку па музейным комплексе "Гугун". Там яны агледзелі тры важнейшыя павільёны архітэктурнага ансамбля: Тайхэдзянь (з кітайскай мовы "Зала вярхоўнай гармоніі"), Чжунхэдзянь ("Зала сярэдняй гармоніі") і Баахэдзянь ("Зала захавання гармоніі"). Пасля прагулкі дзве пары прайшлі ў нядаўна адкрыты пасля рэстаўрацыі павільён Бааюньлоу, які раней служыў імператарскай скарбніцай.
Дональд Трамп у час прагулкі са старшынёй КНР прадэманстраваў на планшэце відэа, дзе яго шасцігадовая ўнучка Арабэла спявае песню і чытае вершы на кітайскай мове. Арабэла прачытала на памяць фрагмент з кнігі "Саньцзыцзін". У гэтым творы, напісаным пры дынастыі Паўднёвая Сун (1127-1279), выкладаюцца ўяўленні аб светабудове і змяшчаюцца маральныя настаўленні. Сі Цзіньпін адзначыў прагрэс дачкі Іванкі Трамп і Джарэда Кушнера ў авалоданні кітайскай мовай, дадаўшы, што ў Кітаі ўнучка Трампа ўжо стала "маленькай зоркай". Ён таксама выказаў надзею, што ў Арабэлы будзе магчымасць наведаць Паднябесную.
Як чакаецца, ключавымі тэмамі перагавораў Дональда Трампа з Сі Цзіньпінам стануць ядзерная праблема Карэйскага паўвострава і пытанні двухбаковага гандлю. Візіт прадоўжыцца да 10 лістапада.-0-
