21 ліпеня, Маладзечна /Кар. БЕЛТА/. У Беларусі шмат зроблена для стварэння безбар'ернага асяроддзя, але гэтага недастаткова. Аб гэтым заявіла намеснік прэм'ер-міністра Наталля Качанава на выязным пасяджэнні Рэспубліканскага міжведамаснага савета па праблемах інвалідаў, перадае карэспандэнт БЕЛТА.
"Праграма на 2011-2015 гады (дзяржпраграма па стварэнні безбар'ернага асяроддзя жыццядзейнасці фізічна аслабленых асоб. - Заўвага БЕЛТА) завяршыла сваё дзеянне, падведзены вынікі. Выкананы ўсе запланаваныя мерапрыемствы, сродкі, якія былі накіраваны з рэспубліканскага і мясцовых бюджэтаў, выкарыстаны ў поўным аб'ёме. Але гаварыць, што мы з вамі зрабілі ўсё, каб стварыць аднолькавыя ўмовы для людзей з інваліднасцю, яшчэ рана. Наведаўшы шэраг аб'ектаў, разумеем, што работа ў гэтым пытанні наперадзе сур'ёзная", - сказала Наталля Качанава. Далейшая рэалізацыя мерапрыемстваў па стварэнні безбар'ернага асяроддзя прадугледжана адпаведнай падпраграмай дзяржпраграмы аб сацыяльнай абароне і садзейнічанні занятасці на 2016-2020 гады. Паводле слоў намесніка прэм'ер-міністра, асабліва важны міжведамасны характар і работа на месцах.
На пасяджэнні намеснік старшыні Мінскага аблвыканкама Віктар Сірэнка падставіў інфармацыю аб рэалізацыі мер па стварэнні безбар'ернага асяроддзя жыццядзейнасці фізічна аслабленых асоб у Мінскай вобласці. Згодна з пяцігадовай абласной праграмай удзельная вага сацыяльных аб'ектаў, адаптаваных для наведвання інвалідамі, павялічылася з 53 працэнтаў у 2011 годзе да 85,6 працэнта на канец 2015-га. Праграмай таксама былі прадугледжаны мерапрыемствы па абсталяванні безбар'ернага асяроддзя па месцы жыхарства інвалідаў.
Па праграме ў гасцініцах Мінскай вобласці абсталяваны нумары для пражывання інвалідаў-калясачнікаў. Такія ўмовы рэалізаваны ў Вілейцы, Валожыне, Салігорску, Дзяржынскім раёне. У 2015 годзе пачаты рамонтныя работы ў гасцініцы горада Мар'іна Горка. На 2016 год запланаваны ўвод у эксплуатацыю гасцініцы ў Нясвіжы, у якой прадугледжаны нумар для інвалідаў-калясачнікаў. На 2017-2019 гады стварэнне аналагічных нумароў запланавана ў Маладзечне, Лагойску, Мядзеле, Стоўбцах, Жодзіне. Рэспубліканскі гарналыжны цэнтр "Сілічы" плануе будаўніцтва гасцініцы з некалькімі нумарамі для інвалідаў-калясачнікаў. Вялася работа па абсталяванні грамадскага транспарту для фізічна аслабленых асоб. Размова ідзе пра такія сродкі, як "бягучы радок", маўленчыя электронныя інфарматары. Цяпер "Мінаблаўтатранс" эксплуатуе 870 аўтобусаў, з іх 200 адзінак нізкападлогавыя. Сумесна з выканкамамі вядзецца работа па набыцці яшчэ 32 такіх аўтобусаў у лізінг, што дасць магчымасць палепшыць якасць абслугоўвання інвалідаў.
Разам з тым удзельнікі пасяджэння адзначылі некаторыя праблемы. Старшыня Цэнтральнага савета ГА "Рэспубліканская асацыяцыя інвалідаў-калясачнікаў" Яўген Шаўко, у прыватнасці, звярнуў увагу на паркоўкі для інвалідаў. Па нормах яны павінны быць шырынёй 3,5 метра - на 1 метр шырэйшыя за звычайныя, каб чалавеку з абмежаванымі магчымасцямі было зручна прыпаркавацца і выйсці з машыны. Гэта, паводле яго слоў, захоўваецца не заўсёды. Больш таго, за мяжой дадатковы метр размячаюць спецыяльнай штрыхавой лініяй, каб астатнія вадзіцелі разумелі, што тут нельга станавіцца. Яўген Шаўко прапанаваў абазначаць паркоўкі аналагічным чынам.
Акрамя таго, было разгледжана выкананне рашэнняў Рэспубліканскага міжведамаснага савета па праблемах інвалідаў ад 21 снежня 2015 года. Мінадукацыі, у прыватнасці, было прадпісана прааналізаваць пытанне арганізацыі падрыхтоўкі і перападрыхтоўкі перакладчыкаў мовы жэстаў на базе Беларускага дзяржаўнага педагагічнага ўніверсітэта імя Максіма Танка. У міністэрстве і педуніверсітэце лічаць, што адкрыццё гэтай асобнай даволі спецыфічнай спецыяльнасці на першай ступені немэтазгодна, паколькі будзе цяжка насыціць навучальную праграму. Да таго ж сама падрыхтоўка спецыяліста не патрабуе столькі часу.
У цэлым на пасяджэнні падкрэслівалася, што забеспячэнне аднолькавых магчымасцей фізічна аслабленым асобам - адзін з галоўных крытэрыяў цывілізаванасці дзяржавы і важнейшы індыкатар маральнага здароўя грамадства.-0-
