15 лютага, Мінск /Кар. БЕЛТА/. Прэзідэнт Беларусі Аляксандр Лукашэнка звярнуўся да воінаў-інтэрнацыяналістаў, ветэранаў вайны ў Афганістане з нагоды Дня памяці, паведамілі БЕЛТА ў прэс-службе беларускага лідара.
"У Дзень памяці воінаў-інтэрнацыяналістаў прыміце словы шчырай удзячнасці за доблесць, стойкасць і мужнасць, праяўленыя вамі ў гарачых кропках планеты. Мы помнім пайменна і смуткуем аб сынах Беларусі, якія цаной уласнага жыцця пацвердзілі вернасць прысязе і воінскаму абавязку, схіляем галовы перад іх бацькамі, удовамі і дзецьмі", - гаворыцца ў звароце.
Кіраўнік дзяржавы адзначыў, што толькі праз гады прыйшло сапраўднае разуменне значнасці тых, ужо далёкіх падзей. "У сучаснай гісторыі вы былі першымі, хто даў рашучы адпор міжнароднаму тэрарызму", - звярнуў увагу Аляксандр Лукашэнка.
"Сёння воіны-інтэрнацыяналісты па-ранейшаму займаюць актыўную жыццёвую пазіцыю, добрасумленна працуюць на карысць роднай Беларусі. Дзякуй, што вы разам з ветэранамі Вялікай Айчыннай вайны прадаўжаеце дастойна выхоўваць маладое пакаленне ў духу сапраўднага патрыятызму", - падкрэсліў Прэзідэнт.-0-
