28 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка 29 чэрвеня ў Мінску прыме ўдзел у мітынгу-рэквіеме, прысвечаным памяці ахвяр нацызму, на тэрыторыі былога лагера смерці "Трасцянец". Аб гэтым БЕЛТА паведамілі ў прэс-службе беларускага лідара.
Плануецца, што ў мерапрыемстве прымуць удзел дэлегацыі з Германіі і Аўстрыі на чале з прэзідэнтамі гэтых краін Франка-Вальтэрам Штайнмаерам і Аляксандрам Ван дэр Беленам. З аўстрыйскага боку мітынг-рэквіем наведае і экс-прэзідэнт Аўстрыі Хайнц Фішэр.
У памятным мерапрыемстве таксама прымуць удзел многія іншыя замежныя госці, уключаючы прадстаўнікоў дзяржаўных і грамадскіх арганізацый з Аўстрыі, Германіі, Ізраіля, Польшчы, Чэхіі. У іх ліку дзяржаўны сакратар канцылярыі Прэзідэнта Польшчы Кшыштаф Шчэрскі, намеснік старшыні Палаты дэпутатаў Парламента Чэхіі Войцах Філіп. Сусветны яўрэйскі кангрэс будзе прадстаўляць намеснік галоўнага выканаўчага дырэктара па пытаннях дыпламатыі Марам Штэрн.
"Трасцянец" - адна з буйнейшых мясцін масавага знішчэння нацыстамі грамадзянскага насельніцтва ў перыяд 1941-1944 гадоў. Па колькасці ахвяр ён знаходзіцца на чацвёртым месцы пасля лагераў смерці "Асвенцім", Майданак" і "Траблінка". У "Трасцянцы" загінулі жыхары Беларусі, іншых савецкіх рэспублік, дэпартаваныя грамадзяне заходнееўрапейскіх дзяржаў, уключаючы Аўстрыю, Германію, Чэхаславакію. Паводле афіцыйных даных, у "Трасцянцы" абарвалася жыццё больш як 200 тыс. чалавек з розных краін.
Плануюцца таксама асобныя сустрэчы кіраўніка беларускай дзяржавы з прэзідэнтамі Аўстрыі і Германіі. Лідары краін - абмяркуюць пытанні сумеснага ўвекавечання памяці ахвяр нацызму, тэматыку двухбаковага супрацоўніцтва і перспектыў выбудоўвання шматбаковага ўзаемадзеяння ў рэгіёне.-0-
