24 кастрычніка, Мінск /Кар. БЕЛТА/. Еўрапейскія камісары абмяркуюць пытанне аб поўным зняцці санкцый адносна Беларусі. Гэта тэма абмяркоўвалася ў час афіцыйнага візіту ў Бельгію намесніка прэм'ер-міністра Анатоля Калініна, паведамілі БЕЛТА ў прэс-службе беларускага ўрада.
"У Бруселі Анатоль Калінін правёў перагаворы з еўракамісарам па пытаннях пашырэння і палітыкі суседства Ёханесам Ханам. Бакі абмеркавалі стратэгію і ўдзел Беларусі ў адным з важнейшых міжнародных праектаў - "Усходняе партнёрства". Акрамя таго, намеснік прэм'ер-міністра закрануў пытанне аб магчымым поўным зняцці санкцый ЕС з нашай краіны. Ёханес Хан адзначыў, што абавязкова абмяркуе гэты момант са сваімі калегамі - еўракамісарамі", - паведамілі ў прэс-службе.
На сустрэчы з еўракамісарам па пытаннях транспарту Віялетай Булц бакі дамовіліся, што агульныя праекты суфінансавання рэгіёнаў будуць праходзіць праз буйнейшы ў Еўропе Банк рэканструкцыі і развіцця і Белінвестбанк.
Акрамя таго, прайшлі сустрэчы з кіраўнікамі буйнейшых індустрыяльных збудаванняў у краіне.
Беларуская дэлегацыя наведала адзін з самых сучасных футбольных манежаў у Бельгіі - стадыён "Геламка Арэна". Сустрэліся беларускія палітыкі і з кіраўнікамі аднаго з буйнейшых у Заходняй Еўропе партоў у Генце. Тут таксама абмяркоўвалася магчымае супрацоўніцтва прадпрыемстваў дзвюх краін. Кіраўніцтва пляцоўкі прапанавала свае паслугі ў транспарціроўцы калійных угнаенняў.
Наступным пунктам на карце перагавораў стаў сусветны цэнтр апрацоўкі і гандлю алмазамі - Антверпен. Тут дэлегацыі расказалі аб унікальным вопыце ў марскіх грузаперавозках, прапанавалі магчымыя сумесныя праекты і правялі незвычайную водную экскурсію.-0-